Цените на акциите паднаа на Волстрит во средата, откако американската централна банка ги зголеми каматните стапки за 0,50 процентни поени и сигнализираше дека цената на задолжувањето ќе остане покачена подолг период од очекуваното.
Dow Jones загуби 0,42 отсто, на 33.966 поени, додека S&P 500 се лизна за 0,61 отсто, на 3.995 поени, а индексот Nasdaq загуби 0,76 отсто, на 11.170 поени.
По четири последователни зголемувања на каматните стапки за 0,75 процентни поени, ФЕД на вчерашната седница ги зголеми каматните стапки за дополнителни 0,50 процентни поени, на опсег од 4,25 до 4,50 отсто, што е нивно највисоко ниво во последните 15 години.
Инвеститорите очекуваа ваков потег, но беа обесхрабрени од проценките дека каматните стапки ќе бидат покачени на повисоки нивоа од очекуваното и дека тие ќе останат на тие нивоа подолго од очекуваното.
Имено, челниците на централната банка проценуваат дека конечната каматна стапка, на која ќе запре циклусот на зголемување на каматните стапки, ќе достигне 5,1 отсто, додека во септември очекуваа 4,6 отсто.
Тоа значи дека ФЕД и во наредната година ќе ги зголеми каматните стапки за вкупно 0,75 процентни поени, во опсег од 5 до 5,25 отсто.
На тоа ниво, ФЕД би го запрел циклусот на зголемување на трошоците за задолжување и би почекал додека не види како таквата монетарна политика би влијаела на инфлацијата.
Проценките за инфлацијата се зголемија во 2023 година
Во претходните денови цените на акциите пораснаа бидејќи инвеститорите се надеваа дека циклусот на зголемување на каматите ќе заврши на пониски нивоа, под 5 проценти. Тие, исто така, се надеваа дека ФЕД може да започне со намалување на каматните стапки на крајот на следната година.
Сепак, се чини дека ништо нема да излезе од тоа бидејќи челниците на ФЕД изјавија дека очекуваат намалување на каматните стапки дури во 2024 година и тоа за еден процентен поен. И со тоа темпо, каматните стапки би се намалиле и во 2025 година.
На прес-конференцијата претседателот на ФЕД Џером Пауел рече дека е неопходно да се продолжи со борбата против инфлацијата за да не се вкоренат очекувањата за зголемени цени.
„Податоците за инфлацијата во октомври и ноември се добредојдени показатели за забавување на растот на цените. Сепак, ќе ни требаат значително повеќе докази дека инфлацијата е на постојана надолна траекторија“, рече Пауел.
Така, ФЕД проценува дека просечната инфлација во следната година ќе се намали од овогодинешните 5,6 на 3,1 отсто. Но, тоа е сепак повисоко од 2,8 отсто проценети во септември и многу над целното ниво на ФЕД од 2 отсто.
Поради сето ова растот на најголемата светска економија ќе се намали. Банката на федерални резерви проценува дека бруто домашниот производ (БДП) следната година ќе порасне за 0,5 отсто, како што беше оваа година. Во септемвриските проекции се очекуваше дека годинава економијата ќе порасне за 0,2 отсто, а следната година 1,2 отсто.
Пауел: Можно е „меко слетување“
Шефовите на неколку големи американски банки деновиве изјавија дека економијата следната година би можела да западне во рецесија.
Но, Пауел сепак верува дека е можно „меко приземјување“ на економијата.
„Мислам дека никој не може да знае дали ќе имаме рецесија или не. А ако ја има, дали ќе биде длабока или не… Едноставно не можете да го знаете тоа“, рече Пауел.
Агресивното зголемување на каматните стапки од страна на ФЕД, како и другите централни банки во светот, со цел да се потисне инфлацијата на пазарите предизвика страв од рецесија и повлекување на инвеститорите од поризични инвестиции, како што се акциите.
Затоа Волстрит е на пат за големи загуби оваа година. Индексот S&P 500 моментално бележи пад од околу 15 отсто од почетокот на годината и е на пат за првиот годишен пад од 2018 година и со најголема стапка од финансиската криза во 2008 година.
И на европските берзи дневните цени вчера паднаа. Лондонскиот FTSE индекс ослабе за 0,09 отсто, на 7.495 поени, додека франкфуртски DAX се лизна за 0,26 отсто, на 14.460 поени, а париски CAC 0,21 отсто, на 6.730 поени.
