Српските демонстранти во северно Косово ги блокираа главните патишта. Патиштата се уште се блокирани.
Амбасадите на Соединетите Американски Држави во Белград и Приштина во заедничко соопштение побараа итно отстранување на блокадите на патиштата на север и „запирање на заплашувањата и заканите со насилство“.
„Оние кои поставија незаконски блокади треба веднаш да ги отстранат. Очекуваме крај на заканите со насилство и заплашување“, се вели во заедничката изјава.
Александар Вучиќ синоќа за Ројтерс изјави дека Србија бара ослободување на сите уапсени Срби и начини за смирување на тензиите на северот на Косово, пренесува РТВ. Во интервју за Ројтерс, кое го даде синоќа по седницата на Советот за национална безбедност, Вучиќ повтори дека Србите во Косово не смеат да учествуваат во насилството врз припадниците на силите на КФОР и ЕУЛЕКС.
Никој, под никакви околности, не треба да учествува во нападите врз ЕУЛЕКС и Кфор“, рече Вучиќ. На прашањето дали Белград ќе се обиде да најде начин да ја деескалира ситуацијата на северот на Косово, тој кратко одговори „апсолутно“.
Агенцијата наведува дека Вучиќ ги обвини приштинските власти и премиерот Албин Курти за поттикнување тензии со „безброј еднострани потези“. Секогаш кога некој мислел дека сме решиле нешто, се појавувал друг проблем“, истакна Вучиќ.
Претседателот на Србија побара ослободување на неодамна уапсените Срби на северот на Косово бидејќи, како што нагласи, „тие се држат под фабрикувани обвиненија и дека косовската полиција мора да се повлече од северот на Косово, во согласност со Бриселскиот договор.
„Косовската полиција нема што да прави на север… Особено луѓето кои се вооружени до заби. Тоа предизвикува непријатност и страв кај српското население“, рече Вучиќ.
Британската агенција тврди дека Вучиќ одбил да прецизира какви чекори усвоил Советот за национална безбедност на седницата.
Претседателот на Српската листа Горан Ракиќ изјави дека е формиран Кризен штаб кој редовно ќе известува за состојбата на терен. Основните и средните училишта на северот на Косово од денеска нема да работат.
Утрото во Лешко и Ибарска Слатина е мирно. Барикадата во Сочаница синоќа дополнително е засилена покрај главниот пат Лепосавиќ – Косовска Митровица, пишува порталот Косово онлајн и додава дека изминатата ноќ била една од најдолгите за тамошните Срби.
Групи луѓе наизменично се менуваа на барикадите во текот на ноќта и утринава.
