Инвестицискиот фонд „Japan Industrial Partners“ (JIP) даде официјална понуда за купување на „Toshiba“ за околу 2,2 трилиони јени (15 милијарди долари), дозна во понеделникот „Nikkei“.
Понудата се базира на моменталната цена на акциите на јапонската технолошка компанија. Специјалниот комитет на „Toshiba“, формиран во април, ќе одлучи дали ќе ја прифати понудата.
Групата предводена од „JIIP“, која е претпочитан понудувач за приватно преземање на јапонската индустриска групација, планира да обезбеди 1 трилион јени во готовина, додека бараат 1,4 трилиони јени финансирање од банките, заедно со кредитна линија од 200 милијарди јени.
Од понеделник, „JIP“ сè уште нема добиено писмо за обврзување од финансиските институции кои треба да ги преземат заемите, додаде „Nikkei“. Сепак, фондот е во преговори да го заврши процесот на финансирање до крајот на ноември, под услов „Toshiba“ да ја прифати понудата.
Специјалниот комитет на „Toshiba“ се состои од седум надворешни директори, вклучувајќи и двајца акционери-активисти. Тие ќе разговараат дали да им го препорачаат предлогот на „JIP“ на другите акционери.
Комисијата мора да ја оцени трансакцијата и да оцени дали таа ќе доведе до зголемување на корпоративната вредност, како и дали предлогот ги исполнува финансиските и законските барања.
Во август, „Toshiba“ објави загуба за првиот фискален квартал поради тековниот недостиг на чипови и зголемените трошоци за суровини. Загубата од 4,8 милијарди јени (35,6 милиони долари) беше прва квартална загуба на компанијата во последните две години. За споредба, „Toshiba“ објави профит од 14,5 милијарди јени една година претходно. Консензусната прогноза на аналитичарите за профитот во првиот квартал беше 19,4 милијарди јени, покажуваат податоците на „Refinitiv“.
