Од денеска стапува на сила законската измена со која се поедноставија процедурите за поставување на фотоволтаици, откако граѓаните и компаниите реагираа дека има огромна документација за производство на сопствена електрична енергија користејќи го сонцето. Со измените, граѓаните и стопанството ќе можат по поволни услови и побрзо да постават фотоволтаици – до 6 киловати за домаќинство и до 40 киловати за фирмите, без административни постапки и без да се чека одобрение за градба од локалната самоуправа.
За поставувањето, треба да се извести Општината, каде се доставуваат потребните документи, заедно со копија од лична карта за граѓаните, а за фирмите извод од Централниот регистар. Се доставува и имотен лист за куќата или објектот на кој се поставува, како и основен проект, а општинските инспектори ќе извршат контрола дали фотоволтаиците се поставени согласно предвиденото во проектот. Ако куќата е на едно лице, а фотоволтаиците ги поставува друг во домаќинството или пак се поставува на куќа под кирија, потребна е и согласност од сопственикот на проектот.
За ова се пофали и министерот за транспорт и врски, Благој Бочварски, кој вели, системот се прилагодува во време на тешка економска криза.
„Во време кога се наоѓаме во сериозна светска енергетска криза, го прилагодуваме системот, преземаме мерки и излегуваме во пресрет на граѓаните и компаниите, а воедно го помагаме и домашниот електро енергетски систем. Даваме силна поддршка, со заедничка акција и дејствување ќе ги надминеме сите предизвици пред кои сме исправени “, рече Бочварски.
Измените во Законот за градење доаѓаат откако граѓаните, но најмногу компаниите реагираа на комплексната постапка за поставување фотовлатици, која предвидуваше над 80 документи, како во централната, така и во локалната власт, а во време кога цените на струјата секојдневно растат.
А.Т
