Шеста година по ред „Forbes“ состави рангирање на најдобрите работодавци во светот. За ажурирањето во 2022-ра година, публикацијата соработуваше со Statista.
Маркетиншката компанија анкетираше 150.000 вработени со полно и со скратено работно време во мултинационални компании во 57 земји за да утврди кои од нив се лидери во критериуми како влијание и имиџ, развој на таленти, родова еднаквост и општествена одговорност, пишува „CNBC“.
На овогодинешното рангирање се вклучени вкупно 800 компании.
Најдобар работодавач за 2022-ра година е „Samsung Group“. Јужнокорејската компанија има 266.673 вработени. Основан во 1938-ма година, технолошкиот гигант е најдобриот избор за неодамна дипломираните студенти, според „Forbes“. Ова е трета година како „Samsung Group“ се позиционира на чело, откако направи огромен скок од 106-то место во 2019-та година.
Компанијата беше пофалена од „Forbes“ во 2020-та и 2021-ва година за вештиот начин на кој се справи со пандемијата со Ковид-19 и за приоритет на безбедноста и здравјето на своите вработени, според „The Korea Herald“.
Најдобрите работодавци во светот:
„Samsung Group“
„Microsoft“
„IBM“
„Alphabet“
„Apple“
„Delta Airlines“
„Costco Wholesale“
„Adobe“
„Southwest Airlines“
„Dell Technologies“
„Microsoft“ годинава го зазема престижното второ место во рангирањето. Треба да се прецизира дека компанијата е рангирана и меѓу најдобрите работодавачи за жени и новодипломирани. Во 2020-та година, „Microsoft“ беше на 21-та позиција во „Fortune 500“ од најголемите корпорации во САД по профит.
Во топ 3 го гледаме и „IBM“. Покрај ова рангирање, компанијата се рангира и меѓу најдобрите работодавци за ветерани според „Forbes“.
