„Danone“ ќе бара купувач за руското работење на својата единица за млечни и растителни производи, а продажбата може да доведе до отпишување до 1 милијарда евра, соопшти француската групација за намирници.
Бизнисот, кој го поседува најголемиот бренд за млечни производи во земјата, „Простоквашино“, придонесе со околу 5 отсто од приходите на „Danone“ во првите девет месеци од годината.
Компанијата ги запре инвестициите во Русија откако Москва ја нападна Украина во февруари, но сега прави порешителен потег во осмиот месец од војната. Иако многу меѓународни компании се повлекоа од Русија, производителите на храна ги продолжија своите активности таму, тврдејќи дека не е морално да се остави населението без храна. „Nestle“ продолжува да увезува производи како храна за бебиња во земјата, а нејзиниот британски ривал „Unilever“ сè уште има фабрики во Русија, откако вети дека ќе продолжи да продава основни производи.
Цената на акцијата на „Danone“ порасна за 1,4% во петокот наутро во Париз поради растот на европските акции.
Единицата што „Danone“ сака да ја продаде е најголемиот бизнис со млечни производи во Русија, со 12 производствени локации и 8.000 вработени. Француската компанија влезе на рускиот пазар пред три децении и изгради основа со купувањето на „Unimilk“ во 2010-та година. Сепак, бизнисот не функционира добро, според аналитичарот на „Bernstein“, Бруно Монтењ.
„Водењето на бизнисот веќе беше многу комплицирано со оглед на сите ограничувања. Да се обиде да го подобри бизнисот во исто време е сосема невозможно“, вели тој.
Продажбата ќе биде комплицирана од фактот што „Danone“ продава и локални брендови и меѓународни брендови како „Activia“. Не е јасно дали новиот оператор ќе ги продава глобалните понуди на „Danone“ и под кои услови.
„Danone“ ќе продолжи да увезува некои специјални прехранбени производи во земјата.
