Владата во заминување на Марио Драги и „Intel“ го избраа градот Вигасио во североисточниот регион Венето како омилена локација за нова фабрика за чипови од повеќе милијарди евра, изјавија две лица запознаени со ова прашање.
Инвестицијата на „Intel“ во Италија е дел од поширокиот план што американскиот производител на чипови го објави минатиот март. Имено, „Intel“ објави дека планира да инвестира дури 80 милијарди евра во следната деценија во градење капацитети низ Европа.
Со почетна инвестиција од околу 4,5 милијарди евра што се очекува да расте со текот на времето, „Intel“ рече дека италијанската фабрика ќе отвори 1.500 работни места, плус дополнителни 3.500 работни места меѓу добавувачите и партнерите, со работа ќе почне помеѓу 2025-та и 2027-ма година.
Италијанската фабрика би била напредна фабрика за пакување и склопување на полупроводници.
Извори велат дека страните постигнале детален сеопфатен договор на почетокот на септември, но дека нема да има јавен оглас пред исходот од изборите, кои се одржаа вчера.
Преферираната локација е добро поврзана со Германија, а особено со градот Магдебург, каде „Intel“ ќе изгради две фабрики, додаде еден од изворите.
„Intel“ и владата, исто така, првично разгледуваа локации во регионите на Ломбардија, Пуља и Сицилија.
Блиските соработници на Драги имаат за цел да влезат во преговори зад сцената со неговите веројатни наследници за да избегнат каков било ризик договорот да биде оспорен од новата италијанска влада, рече изворот, додавајќи дека изборот на локација бил политички многу чувствителен.
Изворите одбија да дадат повеќе детали, но „Reuters“ претходно објави дека Рим е подготвен да финансира дури 40 отсто од вкупната инвестиција на „Intel“ во Италија.
Придонесот на владата во инвестициската програма на „Intel“ е нешто што нужно мора да се сподели со следната влада пред конечно да се формализира каков било договор, рече еден од изворите, додавајќи дека Драги би можел да дозволи следната влада да го објави.
