„Pernod Ricard“ објави подобри од очекуваните резултати за целата година во четвртокот, поттикнати од зголемувањето на цените. Француската групација за алкохолни пијалоци има корист, како и ривалот „Diageo“, од тоа што потрошувачите се префрлаат на поскапи пијалоци, пишува „Reuters“.
Сопственикот на шампањот „Mumm“, вотката „Absolut“ и коњакот „Martell“ рече дека во средина која останува нестабилна со висока инфлација, војната во Украина и блокадите на Ковид во Кина, очекува добар почеток на првиот квартал, кој започна во јули.
Акциите на „Pernod Ricard“ по резултатите паднаа за 1% на 181,65 евра. Брокерската компанија „Jefferies“ рече во коментар дека пораката за првиот квартал е смирувачка, но истакна дека нема конкретни насоки за профитот за фискалната 2023-та година.
„Летните месеци се добри за пазарите“, изјави претседателот и главен извршен директор Александре Рикар во телефонски разговор, додавајќи дека се чувствува уверен во способноста на „Pernod Ricard“ да постигне повеќе зголемувања на цените во оваа фискална година.
Втората по големина светска групација за алкохолни пијалоци соопшти дека со бесплатен готовински тек од повторливи операции со рекордни 1,926 милијарди евра, им нуди на акционерите зголемување на дивидендата од 32% до 4,12 евра по акција и нова шема за откуп од 500 до 750 милиони евра за откуп за фискалната 2022/23 година.
Во 12-те месеци до 30-ти јуни, добивката на компанијата од повторливите активности достигна 3,024 милијарди евра, со органски раст од 19%, надминувајќи ги прогнозите на аналитичарите за пораст од 18,1%.
Продажбата достигна 10,701 милијарди евра, со органски раст од 17%. Во САД тие се зголемија за 8%, во Кина за 5%, а во Индија за 26%.
Од компанијата велат дека добиле пазарен удел на повеќето пазари, а зголемувањето на цените на пазарите во просек изнесувало 4-6%, неутрализирајќи го влијанието на инфлацијата.
Одржливата потрошувачка од страна на луѓето дома, како и отворањето барови и ресторани и брзото закрепнување на патувањата, ја поддржаа продажбата, соопшти компанијата.
Групацијата исто така соопшти дека во финансиските години од 2023-та до 2025-та година ќе ја постигне својата среднорочна цел.
„Pernod“ рече дека ќе има за цел да постигне органски годишен раст на продажбата на горниот крај од опсегот од 4 до 7 проценти на среден рок. Дополнително, таа има за цел оперативната профитна маржа да се зголемува за 50-60 базични поени годишно, сè додека може да постигне годишен органски раст на продажбата во опсег од 4 до 7%.
