Четири години откако данскиот производител на егзотични автомобили „Zenvo“ го претстави суперавтомобилот „TSR-S“ на саемот во Женева, сега повторно е тема на разговор.
За тоа се зборуваше затоа што пред „Top Gear“ претседателот и извршен директор на компанијата „Zenvo“ – Јенс Свердруп рече дека се работи на хиперавтомобилот, но тој ќе се гради од нула. Со нова модуларна шасија од јаглеродни влакна, нов V12 мотор со двојни турбо со моќност до 1.800 ks и нов менувач – целосно внатрешно производство.
Новиот V12 со два електрични турбополначи ќе врти до 10.000 вртежи во минута и ќе произведува 1.200 ks. Ќе ги придвижува задните тркала преку нов осумстепен автоматски менувач. А додавањето на електричен мотор може да обезбеди погон на сите тркала и да ја зголеми вкупната моќност до 1.800 ks. Неговиот дизајн сè уште е тајна, но потенцијалните купувачи веќе добија ексклузивни детали за визијата. Јавното деби на автомобилот треба да се случи во 2023-та година.
Свердруп соопшти и дека се планирани две верзии – хибриден „GT“ со електричен мотор поставен на предната оска за погон на сите тркала. Втората верзија ќе биде за патека, но легална за патишта и може да има неколку аеро-елементи за подобра потисна сила. Тежината на машината ќе биде 1.250 килограми.
Ниту цената не е откриена, но со оглед на претходните автомобили на компанијата, како „Zenvo TS1 GT“ од 1,2 милиони долари, веројатно нема да биде поевтин.
Свердруп додава дека интересот за новиот автомобил е веќе двојно поголем од вкупното производство на компанијата, која во последните 15 години продаде 15 автомобили. Откако го покажа хибридот V12 на потенцијалните купувачи, веќе има 30 нарачки.
За финансиската стабилност на „Zenvo“ зборуваше и Свердруп, кој претходно работеше во „Koenigsegg“ и „Czinger“. Покрај 30-те депозити за новиот хиперавтомобил, бизнисот со мотори и менувачи на компанијата доби пари од група инвеститори од Прага.
