„Lamborghini“ на авто саемот во Франкфурт го претстави „Gallardo LP 570-4 Squadra Corse“ кој се базира на моделот „Gallardo Super Trofeo“ и кој е замислен како автомобил кој „ќе го пренесе спортското доживување од тркачките патеки на улиците“…
Таа намера е видлива веќе на прв поглед поради многуте делови од каросеријата кои се инспирирани од тркачките автомобили. Пред се, тука мислиме на големото задно крило, таканаречено „quick-release“ поклопот за моторот, карбон-керамичните дискови и слично.
Се на се, овој автомобил има голем број на нови делови изработени од карбонски влакна и алуминиум, што му овозможува намалување на вкупната тежина од 70 кг во однос на „Gallardo LP 560-4“. Поконкретно, „Squadra Corse“ тежи 1.340 кг.
Промените на ентериерот се помали и вклучуваат нов тапацир, украси од карбонски влакна и лесни тркачки седишта.
Како и „Super Trofeo“ и оваа верзија ја движи V10 со сила од 570 КС (419 kW) кој е поврзан со 6-степен „e-gear“ менувач и погон на сите четири тркала, што му овозможува на овој автомобил забрзување до 100 км/ч за 3,4 секунди.До 200 км/ч „Squadra Corse“ стигнува за 10,4 секунди, додека максималната брзина што може да ја постигне е 320 км/ч.
