Граѓаните на Хрватска и Босна и Херцеговина ги вознемири светлечкиот феномен на небото, но астрономите објаснија дека нема причина за загриженост бидејќи тоа се сателити на Илон Маск.
Уредниците на порталот klix.ba околу 22 часот биле контактирани од граѓани за непозната појава на небото. Како што истакнуваат некои од нив, светлечкиот објект можел да се види на северозападот на Босна и Херцеговина. Но, оваа појава вознемири и многу Хрвати.
Затоа Хрватското астрономско друштво појасни за што се работи.
„Она што вечерва беше видено на небото се новите Starlink сателити на компанијата SpaceX на господинот Илон Маск, кои се користат за обезбедување на глобални интернет услуги. „Кога ќе бидат ослободени од ракетата, тие одат еден по друг, а потоа се шират и одат паралелно многу блиску еден до друг додека не се рашират и секој стигне до својата орбита“, напишаа тие.
Сателитите Starlink обезбедуваат интернет услуги за луѓе кои живеат во оддалечени области без пристап до брз интернет, а тоа се постигнува токму со лансирање на сателити во вселената.
Index.hr пренесува дека сателитите биле видени и од Паг, Цавтат, Задар, Брач и Трогир, од каде што читателите им испратиле фотографии од блескав објект.
Многумина им го опишаа објектот, објаснувајќи дека изгледа како змија на небото која се задржала многу подолго од класичен метеор.
