Швајцарската банка UBS истражуваше како изгледаат резервите на 30 водечки централни банки.
Големото геополитичко „преуредување“ кое моментално се случува во светот, поттикнато од војната во Украина, се одразува и во постепената ерозија на доларот како водечка валута во девизните резерви на централните банки.
Според Financial Times (FT), централните банкари се повеќе се заинтересирани за зголемување на изложеноста на девизните резерви на кинескиот јуан.
Кинескиот јуан
Уделот на менаџерите на девизните резерви во светските централни банки кои инвестирале или се заинтересирани да инвестираат во кинеската валута се зголемил од минатогодишните 81 отсто на 85 отсто оваа година, покажува годишното истражување на швајцарската банка УБС спроведено на 30 водечки централни банки измеѓу април и јуни, пренесува Пословни дневник.
„Сведоци сме на постепена ерозија на доларот“, вели Масимилијано Кастели, раководител на стратешка анализа во секторот на глобалните пазари во UBS. „Сликата што се појавува е мултиполарен валутен систем“, додаде Кастели.
Зголемениот интерес за јуанот дојде откако западните земји замрзнаа околу 300 милијарди долари од руските девизни резерви како одговор на рускиот напад врз соседна Украина. Иако мнозинството централни банкари го оценуваат тој настан како изолиран, тој дефинитивно ги затегна односите меѓу западните земји и Русија и ги комплицира односите со земјите кои не се приклучија на санкциите, како што е Кина.
Ова го забрза проширувањето на јазот меѓу Кина и САД што започна за време на трговската војна започната за време на администрацијата на Доналд Трамп. Во овој контекст, четири петтини од испитаниците во истражувањето на UBS сметаат дека ова е потег во насока на создавање мултиполарен свет од кој јуанот ќе има корист. Помалку од половина мислат дека доларот ќе има корист од тоа.
Високата инфлација и (засега неуспешните) напори на ФЕД да ја намали со зголемување на каматните стапки, исто така, влијаат на краткорочните вреднувања на доларот. Треба да се нагласи дека другите централни банки обично го држат доларот преку изложеност на американски државни обврзници, кои беа цел на остра распродажба оваа година поради заострувањето на монетарната политика од страна на ФЕД.
Истражувањата покажаа дека управителите на девизните резерви бараат алтернативни форми на средства, како акции, зелени обврзници или должнички хартии од вредност заштитени со инфлација. Речиси половина од испитаниците истакнуваат дека нивните портфолија се значително поразновидни оваа година од лани.
Ерозијата на доларот
Иако доларот сè уште е убедливо најзастапената валута во девизните резерви на централните банки, неговото учество се намалува во последните години. Уделот на доларот на крајот на првиот квартал беше нешто помалку од 60 отсто, додека во истиот период во 2016 година беше 65 отсто, покажуваат податоците на Меѓународниот монетарен фонд.
Кинеската валута и натаму е симболично претставена, со помалку од три отсто учество во девизните резерви. Треба да се нагласи дека повеќето управители со девизни резерви годинава ја зголемија изложеноста кон американскиот долар.
Меѓу анкетираните, 62 отсто ја зголемиле изложеноста на доларот во минатата година, а 54 отсто ја зголемиле изложеноста на јуанот. „Во наредниот период ќе видиме дека менаџерите на девизните резерви ќе продолжат да размислуваат што друго можат да направат за да ги зајакнат своите инструменти во борбата против нестабилноста и макроекономските проблеми“, заклучува Кастели.
