Силното закрепнување на авиосообраќајот од пандемијата ќе им овозможи на глобалните авиокомпании да ги намалат своите загуби оваа година и веројатно да се пробијат до профитот во 2023-та година, очекува Меѓународната асоцијација за воздушен транспорт.
„IATA“ ги зголеми своите прогнози за секторот во понеделникот, очекувајќи веќе глобалните авиокомпании да пријават вкупна загуба од 9,7 милијарди долари во 2022-ра година – нагло подобрување во однос на ревидираната загуба од 42,1 милијарди долари во 2021-ва година.
Прогнозата за 2022-ра година е за речиси 2 милијарди долари подобра од претходните очекувања за загуба од 11,6 милијарди долари.
Проценките за минатогодишните загуби исто така се подобруваат од претходните 52 милијарди долари, иако авиокомпаниите кои имаат годишен состанок во Катар се предупредени дека високите цени на нафтата и ризикот од инфлација го загрозуваат кревкото закрепнување.
„Нашата индустрија сега е послаба, поздрава и поагилна“, рече извршниот директор на „IATA“, Вили Волш, на годишниот состанок на повеќе од 100 лидери на авиокомпании.
„На хоризонтот треба да се постави профит за целиот сектор во 2023-та година“, додаде тој.
Се очекува Северна Америка да остане регион со најдобро работење и единствен што остварил профит во 2022-ра година, проценет на 8,8 милијарди долари.
Во Азија, каде што границите на Кина остануваат затворени, а домашниот пазар е под притисок поради нултата стратегија за Ковид-19, авиокомпаниите очекуваат вкупна загуба од 8,9 милијарди долари.
Оваа прогноза исто така е подобрена бидејќи аеродромите и авиокомпаниите се натпреваруваат да ангажираат илјадници вработени за да одговорат на повторната побарувачка од напорите на луѓето да ги надоместат пропуштените одмори за време на пандемијата.
Некои аналитичари изразија стравување дека зголемувањето на цените на билетите и притисокот врз потрошувачката на потрошувачите од инфлацијата и зголемените трошоци за задолжување може да предизвикаат остар пад на побарувачката по летниот период.
„Не мислам дека ова е минлив успех. Мислам дека има одредена акумулирана побарувачка што се исполнува во моментов, но мора да запомните дека сè уште сме многу под нивото на кое бевме во 2019-та година“, рече Волс.
