Шведскиот гигант „IKEA“ во средата објави дека ќе ги продаде своите фабрики, ќе ги затвори канцелариите и ќе укине речиси 28.000 работни места во Русија, најновиот потег на најголемиот светски бренд за мебел за намалување на активноста од инвазијата на Москва на Украина, објави „Reuters“.
Потегот доаѓа откако „IKEA“ привремено ги затвори своите продавници и ги прекина испораките за Русија, приклучувајќи се кон масовното корпоративно излегување додека западните компании се обидуваат да спроведат санкции и во услови на закани од Кремљ дека ќе ги заплени странските средства.
Шведската компанија продолжи да ги плаќа своите вработени и тоа ќе го прави до крајот на август.
Во средата, компанијата соопшти дека не гледа можност за продолжување на продажбата во догледна иднина во земјата, каде што ја отвори својата прва продавница во 2000-та година.
Како резултат на тоа, сопственикот на брендот „Inter IKEA“, кој исто така е одговорен за набавките, рече дека сега ќе започне да бара купувачи за своите четири фабрики, трајно ќе затвори две логистички канцеларии во Москва и Минск и ќе го намали персоналот.
„IKEA“ има 15.000 вработени во земјата, а „Ingka Group“, која ги поседува сите продавници на „IKEA“ во Русија, има уште 12.500 вработени.
„За жал, околностите не се подобруваат и деструктивната војна продолжува. Компаниите и синџирите на снабдување ширум светот се под силно влијание и не гледаме можност наскоро да продолжиме со работа“, се вели во соопштението на „Ingka Group“.
Сепак, „Ingka“ – исто така еден од најголемите сопственици на трговски центри во светот, ги држи отворени своите 14 трговски центри во Русија, под брендот „MEGA“.
Компанијата вели дека сака да обезбеди луѓето да имаат пристап до основните потреби, вклучувајќи облека, намирници и аптеки, но продолжува да ја проценува ситуацијата.
Компанијата одби да ги коментира плановите за 17-те затворени продавници, велејќи дека „истражува различни опции“.
Досегашните чекори се разликуваат од другите големи западни компании, како што се „McDonald’s“ и францускиот производител на автомобили „Renault“, кои ги продадоа своите средства на локални купувачи и целосно ја напуштија земјата.
Малопродажбата е во мирување, вели „IKEA“, но сугерира дека можеби ќе ги отвори вратите за Русите за последен пат.
„Со цел да ги гарантираме потребните деловни процеси, организираме продажба на покуќнина во нашите магацини на вработените и клиентите. Датумите ќе бидат објавени наскоро“, велат од „IKEA“.
Компанијата соопшти дека може да донира дел од стоката на луѓето на кои им е потребна.
Но, продажбата на вишок залихи и генерирањето приходи таму може да предизвика бурни реакции со оглед на јавниот и политичкиот притисок врз компаниите да не заработуваат од водење бизнис во Русија.
„Разгледавме широк спектар на опции пред да одлучиме да ја продадеме залихата и нема друго остварливо решение“, соопшти компанијата.
