Американскиот производител „Cadillac“ го откри својот нов прототип на тркачки автомобил кој ќе учествува на Светскиот шампионат за издржливост на „FIA“ во 2023-ра година, како и во американската серија „IMSA“. Враќањето на брендот дојде по пауза која траеше повеќе од 20 години.
Хиперавтомобилот „Project GTP“ беше развиен од дизајнерското студио и спортскиот оддел на „Cadillac“, кои добија помош од специјалистите на „Dallara“. Оваа компанија е активно вклучена во развојот на тркачки автомобили кои можат да се натпреваруваат во двата веќе споменати шампионати за издржливост.
Прототипот на тркачки автомобил ќе биде опремен со хибриден погонски систем кој ќе биде идентичен со оној на другите автомобили од класата „LMDh“. Во овој случај, ќе добие целосно нов 5,5-литарски V8 DOHC мотор. Ќе има некаков облик на принудна индукција, но Американците засега не откриваат детали.
Дебито на „Cadillac GTP Hypercar“ ќе биде на трката „Daytona 24 Hours“ во јануари 2023-та година, а тестовите ќе започнат во текот на летото. Компанијата наведува дека развојот на тркачкиот автомобил продолжува, а од фотографиите се гледа дека добил некои детали од „цивилните“ автомобили на марката и особено од електричниот автомобил „Lyriq“.
„Cadillac“ ќе има доста сериозни конкуренти во класата „LMDh“. Меѓу нив се „Lamborghini“ и „BMW“, а Баварците веќе го покажаа својот автомобил наречен „M Hybrid V8 LMDh“. Исто така, нема детали за него, бидејќи е познато само дека V8 моторот има двојна турбо и хибридна технологија која ги задоволува барањата на класата.
Друг голем производител – „Audi“, исто така до неодамна планираше да направи автомобил од класата „LMDh“, но проектот беше ставен во мирување. А објаснувањето е дека капацитетот на германската компанија се користи за други цели кои се поразумни во моментов.
