Светскиот економски форум во швајцарскиот алпски град Давос започнува денес по пауза од две години, бидејќи пандемијата на коронавирусот спречи да се соберат политички и деловни лидери, експерти и активисти.
Не недостасуваат итни прашања што треба да се решат на годишниот состанок на Светскиот економски форум: зголемувањето на цените на храната и горивата, руската војна во Украина, климатските промени, сушата и недостигот на храна во Африка, нееднаквоста меѓу богатите и сиромашните, автократските режими и пандемии.
Војната во Украина ќе биде клучна тема. Претседателот Володимир Зеленски ќе зборува денеска, на денот на отворањето, преку видео-врска од Киев. Во салата во Давос ќе присуствуваат и министерот за надворешни работи на Украина и значајна делегација на други високи украински функционери.
Оваа недела ќе им се придружат и лидерите како германскиот канцелар Олаф Шолц, американскиот претставник за климата Џон Кери, генералниот секретар на НАТО Јенс Столтенберг и претседателката на Европската комисија Урсула фон дер Лајен.
Светскиот економски форум е место каде се разгледува помошта за Украина
Поради руската војна против Украина, руските деловни и политички лидери не беа поканети во Давос оваа година.
Претседателот на Форумот – меѓународна невладина и лобистичка организација, Борге Бренде, рече дека голем број извршни директори и други деловни лидери ќе размислат како приватниот сектор може да ја поддржи Украина, во ситуација кога Русија го крши меѓународното право, меѓународното хуманитарно право и не се придржува од Повелбата на ОН“.
Не сите веруваат дека Давос е место каде може да се најдат решенија.
Десетици антикапиталистички демонстранти се судрија со полицијата во петокот во Цирих, најголемиот град во Швајцарија. Тоа е знак на антагонизам против економските елити кои ги обвинуваат овие групи дека го ставаат профитот над народот.
Полицијата употреби гумени куршуми и бибер спреј за да ја растера толпата од недозволениот собир.
Украина ќе привлече внимание на првиот ден од средбата. Сепак, климатските и еколошките прашања ќе бидат постојана тема, бидејќи форумот се осврнува на идните предизвици исто како и на сегашните.
