По силниот раст на почетокот на годината, германската модна групација „Hugo Boss“ верува дека е на пат да постигне рекордни резултати и покрај загубата на рускиот бизнис, зголемените трошоци и блокирањето на производството во Кина.
„Генерално, „Hugo Boss“ направи подобро во првите три месеци отколку што очекувавме. Растот на продажбата приспособен според валутата од 52% на годишно ниво е одличен резултат“, рече финансискиот директор Ив Мулер.
Тој додаде дека компанијата работи динамично во однос на годината пред коронавирусот – 2019-та година.
„Глобално, за три години видовме раст од 17 отсто на годишна основа, поттикнат од постојан раст од 21 отсто во Европа и подеднакво извонреден раст од 17 отсто во Соединетите држави“, рече Мулер.
Модната група, позната по машките костуми, посегна длабоко во маркетиншките џебови.
„Генерално, ова е најголемата кампања во историјата на нашиот концерн досега. Нашите расходи за маркетинг се удвоија на 80 милиони евра во првиот квартал во споредба со 2019-та и 2021-ва година. Износот претставува 10% од приходите на групацијата“, вели директорот
Значителната инвестиција во дигиталното присуство исто така се исплатеше. Дигиталната продажба е зголемена за уште 22%.
Севкупно, приходите во првите три месеци се зголемени за 52% на 772 милиони евра, приспособени на валутни ефекти. И покрај инвестициите, оперативната добивка (EBITА) од 40 милиони евра значително ја надмина вредноста од 1 милион евра за претходната година.
И покрај силниот почеток на годината, „Boss“ ги задржува своите цели за годината непроменети. Тие предвидуваат зголемување на приходите од 10-15% до рекордно ниво од 3,1-3,2 милијарди евра. Во однос на добивката пред камати и даноци (EBITА), групацијата има за цел да се зголеми меѓу 10% и 25% на 250-285 милиони евра.
Постигнувањето на целниот коридор не е однапред одредено, нагласи Мулер. Постојат голем број на ризици кои се надвор од контрола на компанијата.
„Меѓу нив се зголемените транспортни трошоци и секако високата инфлација. Покрај тоа, пандемијата на коронавирус не е завршена. Во моментов, сепак, ние сме убедени дека 2022-ра година ќе биде успешна за „Hugo Boss“ и покрај тешката средина“, објасни тој.