Профитот на „Anheuser-Busch InBev“ се зголеми бидејќи потрошувачите продолжија да купуваат поскапи пива, неутрализирајќи го влијанието на зголемените трошоци, објави „Bloomberg“.
Добивката за првиот квартал пред оданочување се зголеми за 7,4% на приспособена основа, соопшти компанијата. Аналитичарите очекуваа раст од 3,9%. Цената на акцијата порасна за 3,6%.
„Heineken“ и „Carlsberg“, исто така, забележаа раст на приходите од продажба, надминувајќи ги прогнозите на аналитичарите, најмногу благодарение на зголемувањето на цените.
Досега, потрошувачите кои се вратија во баровите во САД и Европа по укинувањето на блокадата не беа спречени да платат повеќе за своето пиво, а повисоките цени сè уште немаат значително влијание врз обемот. Пиварите се зависни од нивниот апетит за поскапо пиво, откако фјучерсите на алуминиум достигнаа рекордно ниво во последниве месеци, бидејќи трошоците за јачменот и транспортот се зголемија.
Приходите на „AB InBev“ пораснаа за 11 отсто, соопшти компанијата. Продажбата на нискокалоричното пиво „Michelob Ultra“ се зголеми за повеќе од 10% во САД, а гигантот вели дека се шири побрзо од своите конкуренти во сегментот на готови жестоки пијалаци со производи како што се коктелите „Cutwater“.
Приходите од продажба во Кина паднаа за 1,2% поради блокадите поради Ковид-19.
Компанијата ја задржа прогнозата за годишен раст на прилагодената добивка пред даноци, такси, камати и амортизација, очекувајќи таа да биде меѓу 4 и 8 проценти. Аналитичарите очекуваат зголемување од 5,9%. „AB InBev“ предвидува уште побрз раст на приходите од продажба.
Компанијата со седиште во Левен, Белгија минатиот месец соопшти дека очекува удар од 1,1 милијарди долари од продажбата на својот удел во заедничкото вложување во Русија.
