Во моментов, ако имате „iPhone“, но исто така сте купиле еден од најдобрите телефони со „Android“, преносот на податоци од еден уред на друг може да биде кошмар. За среќа, тоа може да се промени наскоро.
Се чини дека „Google“ работи на апликацијата „Switch to Android“, која многу ќе го олесни испраќањето важни датотеки од „iPhone“ на уред со „Android“ – исто како што е можно од „Android“ на „iOS“.
Информацијата ја објави сајтот „9to5Google“, кој имаше можност да ја тестира апликацијата пред извесно време. Веб-страницата откри апликација која можете да ја преземете на „iPhone“, а се очекува да има пандан на „Android“ кога ќе биде официјално објавена.
Сѐ уште не е познато кога би можела да излезе апликацијата „Switch to Android“, но бидејќи „9to5Google“ успеа да ја преземе и искористи, се чини дека е речиси подготвена за пуштање.
Со оглед на тоа колку беше досадно испраќањето податоци од „iPhone“ на „Android“ претходно, новата апликација ќе биде корисна алатка за оние кои се префрлаат од екосистемот на „Apple“ на „Android“.
