Во понеделникот, „Tesla Inc.“ ја зголеми својата берзанска вредност за околу 84 милијарди долари, повеќе од вкупната пазарна капитализација на „Ford Motor Co.“, откако производителот на електрични автомобили соопшти дека планира нова поделба за околу две години.
Неодамна, поделбата на акциите на големи компании се врати во центарот на вниманието по „Amazon.com Inc.“, претходно овој месец рече дека ќе направи поделба 20 за 1, по што ќе следи планот на „Alphabet Inc.“ за сличен потег објавен во февруари. Така, овие компании се обидуваат да ги направат своите скапи акции попривлечни за индивидуалните инвеститори.
„Tesla“ е една од осумте компании во широкиот индекс со четирицифрена вредност на акциите, според пресметките на „Bloomberg“.
Веста, објавена преку „Twitter“, придонесе дополнително да го поттикне неодамнешниот собир на акциите на „Tesla“. Компанијата е најголемиот победник во индексот „FANG +“ на „NYSE“ во оваа година. Акциите се затворија за 8 отсто до 1.091,84 долари во понеделникот, што е највисоко ниво од 12-ти јануари.
Кога последен пат „Tesla“ ги подели своите акции беше во август 2020-та година. Истата година, цената на нејзината акција порасна за неверојатни 743%, а поделбата често се наведуваше како една од причините за растот.
Иако има малку детали за планот на „Tesla“, еве неколку првични реакции од менаџерите на фондовите, стратезите и аналитичарите.
„Ова навистина ќе ја зголеми побарувачката за акциите. Имаме вреднување за „купи“ акции, па затоа сме оптимисти за нивното работење во следните 12 месеци. Поделбата на акциите на компанијата и воведувањето дивиденда сега ќе ја зголеми атрактивноста за инвеститорите ориентирани кон приходи“, изјави Сем Стовал, главен инвестициски директор, стратег во „CFRA“, цитиран од „Bloomberg“.
„Многу луѓе мислат дека ова е класичен пример за работата на пазарната психологија. Ако погледнете наназад во времето, повеќето компании работат добро и се претставуваат добро, а во некои случаи и многу добро, по најавата за поделба на акциите“, изјави Марк ЛоПрести, управен директор на „The Strategic Funds“.
„Во ваков случај, Илон Маск е апсолутно брилијантен во пазарната психологија. Тој е еден од мајсторите за пазарна психологија“, додава ЛоПрести.
И Даниел Ајвс, аналитичар во „Wedbush“, не е изненаден што компанијата се движи кон уште една поделба на акциите, особено во услови на постојана побарувачка за електрични возила и изградба на водечки фабрики во Берлин и Остин, кои „веќе се на пат да се движат“.
„Го гледаме потегот на „Tesla“, по одлуките на „Amazon“, „Google“, „Apple“ и иницирањето втора поделба на акциите за две години како паметен стратешки потег што ќе биде позитивен катализатор за акциите во иднина“, рече Ајвс.
50-годишниот извршен директор Илон Маск ја продолжува својата расправија со американскиот регулатор на берзата поради тужбата што ја поднесе против него и „Tesla“ во 2018-та година, откако претприемачот напиша на „Twitter“ дека ќе ја тргне компанијата од пазарот. Минатата недела „SEC“ го отфрли повикот на Маск да престане да ги надгледува неговите објави на социјалната платформа, велејќи дека ќе продолжи да ги следи тврдењата на Маск против најголемиот светски производител на електрични автомобили.
