„Audi“ се подготвува да го претстави својот нов кросовер „Q6“, кој првично ќе биде достапен во Кина. Официјални фотографии од моделот беа објавени на веб-страницата на кинеското Министерство за индустрија.
Судејќи според нив, новиот теренец на производителот од Инголштад ќе го добие добро познатиот дизајн на компанијата со масивна хексагонална решетка на ладилникот, тесни фарови и моноблок задни светла. Веќе е познато дека „Q6“ ќе биде достапен со 3 реда седишта, а купувачот ќе може да избира помеѓу 6 и 7 седишта.
Во кабината на кросоверот има виртуелна табла со инструменти, огромен екран на инфозабавниот комплекс и сензорска единица за контрола на климата.
Според информациите, должината на автомобилот е 5.099 mm, ширината е 2.014 mm, а висината е 1.784 mm. Растојанието помеѓу двете оски е 2.980 mm. Засега е познато дека „Audi Q6“ на пазарот ќе се појави со 2.0-литарски турбо мотор, достапен во две варијанти на моќност со 231 или 261 коњски сили. Моторот е комбиниран со 8-брзински автоматски менувач и систем за погон на четири тркала.
Се очекува премиерата на новиот теренец на германската марка да се случи во април, а продажбата ќе стартува на лето. Сè уште не е јасно дали „Q6“ ќе се продава на други пазари освен во Кина. Сепак, познато е дека „Audi“ подготвува електричен кросовер „Q6 e-tron“, кој ќе биде достапен во Европа и во САД.
