Рускиот претседател Владимир Путин во саботата изјави дека сè се одвива според планот во Украина и дека руската армија ќе ги исполни своите цели како дел од специјалната воена операција.
Путин рече дека западните санкции против Русија се како објавување војна и ја бранеше руската инвазија на Украина, велејќи дека Москва треба да ги брани оние што зборуваат руски во источна Украина, како и нејзините интереси.
„Овие санкции што се воведуваат се слични на објавување војна, но фала богу тоа не се случи“, рече Путин, обраќајќи им се на групата стјуардеси во центарот за обука „Аерофлот“ во близина на Москва.
Во коментарите емитувани на државната телевизија, лидерот на Кремљ рече дека Русија сака Украина да се „демилитаризира“, „денацифицира“ и дека Украина треба да има неутрален статус.
Путин нагласи дека Русија ќе ја смета секоја земја што ќе се обиде да воведе зона на забранети летови над Украина за противник во војната.
НАТО го отфрли барањето на Киев за зона на забранети летови.
„Ќе го сметаме секој развој во оваа насока како учество во вооружениот конфликт на која било земја на чија територија нашите војници би биле загрозени“, рече тој за можната „зона на забранети летови над територијата на Украина“.
Путин рече дека Русија не планира да воведе вонредна состојба, одговарајќи на гласините дека тоа ќе го направи поради конфликтот во Украина.
„Се воведува вонредна состојба во случај на агресија, особено во областите каде што се водат борби. Немаме таква ситуација и се надевам дека нема да има потреба да се интервенира“, рече тој.
Според него, во руските воени операции во Украина учествуваат само професионални војници и офицери, а Кремљ не планира да испраќа регрути или резервисти.
„Нашата армија ќе ги исполни сите свои задачи. Не се сомневам во тоа. Се оди според планираното“.
Бројните гласини ги принудија Русите да се плашат од мобилизација и воведување вонредна состојба.
