Акциите на глобалните пазари денеска драстично паднаа, додека цените на недвижностите кои важат за безбедни засолништа, како нафтата и златото пораснаа, бидејќи источна Европа се наоѓа на работ на војна, откако рускиот претседател Владимир Путин им нареди на војниците да влезат во регионите Доњецк и Луганск, источна Украина.
Најширокиот азиско-пацифички индекс MSCI, без јапонскиот, е на пат да го забележи најлошиот ден за овој месец и моментално е во пад од 2,1 отсто, поттикнат од падот на берзите во Хонг Конг и континентална Кина.
Јапонскиот индекс Nikei потона за 2,5 отсто.
Американските и европските берзи исто така се движат кон силни загуби на отворањето на тргувањето, при што њујоршкиот фјучерс индекс S&P 500 падна за 1,8 отсто, технолошката Nasdaq за 2,5 отсто, паневропскиот фјучерс индекс EuroStox 50 за 1,53, аа Лондон FTSE за 0,89 отсто.
Спротивно на тоа, цената на европските фјучерси на нафтата брент, односно договорите за испорака во наредниот период по договорената фиксна цена, порасна за 1,5 отсто на 96,85 долари за барел, откако на почетокот на тргувањето достигна ново седумгодишно највисоко ниво од 97,21 долари поради загриженоста дека рускиот извоз на енергија може да биде нарушен. Спотот на златото порасна за 0,2 отсто на 1.909,10 долари за унца, достигнувајќи нов шестмесечен максимум од 1.911,56 долари претходно на трговската сесија.
Во понеделникот, Путин призна два отцепени региони во источна Украина како независни републики и нареди испраќање на руската армија, како што вели Москва, во мировна операција во таа област, што доведе до врвот на украинската криза што може да предизвика голема војна, пренесува Ројтерс.
Вашингтон и европските престолнини го осудија потегот, ветувајќи нови санкции. Украинскиот министер за надворешни работи рече дека добил уверување за „одлучен и обединет“ одговор од Европската унија.
Сепак, претставник од администрацијата на Бајден рече дека потегот на Русија сè уште не е „инвазија“ што ќе предизвика поширок пакет санкции, бидејќи не отстапува од она што Русија веќе го направи.
На берзата во Хонг Конг акциите на рускиот производител на алуминиум Русал паднаа за цели 22,1 отсто на 6,18 хонгконгшки долари, што е нивен најголем дневен процентуален пад од април 2018 година.
Кинеските технолошки акции котирани во Хонг Конг потонаа за 2,7 отсто поради шпекулациите за нов бран на заострување на регулативите, што ги погоди најмногу акциите на Tencent и Alibaba.
На валутните пазари движењата се нешто попригушени, освен руската рубља, која на почетокот на тргувањето во Азија падна на најниско ниво во последните 18 месеци, пред да се стабилизира.
Јапонскиот јен се врати на раст на отворањето на сесијата, достигнувајќи речиси тринеделен максимум од 114,50 за долар. Швајцарскиот франк се држи блиску до едномесечниот максимум забележан во понеделникот, при што еврото падна за 0,2 отсто до еднонеделното ниско ниво од 1,1286 долари.
