Американската компанија за играчки „Hasbro“ ги надмина прогнозите на аналитичарите за своите квартални приходи и профит, поддржани од закрепнувањето на нејзиниот телевизиски бизнис и зголемувањето на цените како одговор на влијанието на проблемите со синџирот на снабдување.
Акциите на производителот на играта „Monopoly“ поскапеа за 3,3 отсто до 97 долари пред почетокот на трговскиот ден.
Приходите на „Hasbro“ од забава пораснаа за 54 отсто во четвртиот квартал, кој заврши на 26-ти декември, на годишна основа, откако компанијата ги објави новите епизоди на „Yellowjackets“ на „Showtime“ и Клифорд, големото црвено куче.
За споредба, една година порано, на резултатите влијаеше исклучувањето на производството поради пандемијата.
Враќањето на филмовите за суперхероите на „Marvel“ го поддржа и одделот за производи за широка потрошувачка на компанијата, кој порасна за 9% на годишно ниво во текот на кварталот поради побарувачката за играчки засновани на филмски ликови.
Како и неговиот ривал „Mattel“, „Hasbro“ се обидува да генерира повеќе приходи од ТВ продукции, филмови и видео игри, додека се фокусира на претворање од производител на играчки во компанија за забава.
Вкупниот нето приход на „Hasbro“ се зголеми за 17 отсто на 2,01 милијарди долари во четвртиот квартал на годишна основа, аналитичарите прогнозираа 1,87 милијарди долари, според „Refinitiv“.
На приспособена основа, компанијата заработи 1,21 долар по акција во споредба со очекуваните 88 центи по акција, откако зголемувањето на цените минатата година помогна да се неутрализира растот на суровините и транспортот.
„Hasbro“, кој во јануари го објави шефот на својот оддел за дигитални игри Крис Кокс за нов извршен директор, сега вели дека очекува неговите приходи да пораснат меѓу 1% и 3% во фискалната 2022-ра година. Аналитичарите прогнозираат просечен пораст од 3,9%.
