„Sony Group“ го купува „Bungie“, американскиот развивач на видео игри зад популарната серија „Destiny“, во зделка од 3,6 милијарди долари за да ја зајакне својата гејмерска единица, пишува „Bloomberg“.
Договорот, објавен во понеделникот, е трета голема аквизиција во сегментот на видео игри овој месец. Претходно стана јасно дека „Microsoft“ го купува „Activision Blizzard“ за 69 милијарди долари, а „Take Two Interactive“ ја купи „Zynga“.
Купувањето на „Bungie“ ќе му ги даде на „Sony“ правата на една од најпопуларните игри со пукање во прво лице, која е главен конкурент на „Call of Duty“, кој сега е во сопственост на главниот конкурент на „Sony“ преку преземањето на „Activision“.
Претходно, „Bloomberg“ објави дека „Microsoft“ се обврзал да ги лансира најмалку следните три игри од серијата „Call of Duty“ на конзолите на „Sony“ – „PlayStation“. Сепак, „Microsoft“ сепак може да одлучи да ги остави игрите исклучиво на своите „Xbox“ конзоли.
„Bungie“ не е првото студио за видео игри што го купи „Sony“, но секако е најголемото барем во последната деценија. Јапонскиот гигант обично се фокусира на помалку етаблирани студија како „Naughty Dog“ и „Guerrilla Games“. „Sony“ има и малцински акции во некои големи гејмерски компании како што е „Epic Games“, авторот на хитот „Fortnite“.
Во последниве години, „Sony“ направи некои помали аквизиции, како што се „Insomniac Games“ и „Housemarque“, во обид да го прошири својот каталог со ексклузивни имиња за својата конзола „PlayStation“.
„Bungie“ со седиште во Вашингтон, е основана во 1991-ва година, му помогна на „Xbox“ да се истакне со својата игра „Halo“ и беше купен од „Microsoft“ во 2000-та година. Во 2007-ма година, студиото се согласи на независност и се раздели со „Microsoft“ за да работи на следниот хит, „Destiny“ со „Activision“. Нивната врска заврши во 2019-та година и „Bungie“ самата почна да го издава „Destiny“.
