Меѓународниот монетарен фонд (ММФ) ја намали својата прогноза за глобалниот економски раст оваа година поради зголемените случаи на коронавирус поради позаразната варијанта омикрон, прекинот во синџирот на снабдување и повисоката инфлација, кои го попречуваат економското закрепнување.
Во својот последен извештај за глобалните економски перспективи, објавен во вторникот, институцијата со седиште во Вашингтон предвидува дека растот на глобалниот бруто домашен производ ќе ослабне од 5,9% во 2021-ва година на 4,4% во 2022-ра година. Овогодинешната прогноза е ревидирана за половина процентен поен во споредба со октомвриската проценка.
„Светската економија влегува во послаба позиција во 2022-ра година отколку што се очекуваше. Поради ширењето на новата омикрон варијанта на коронавирусот, голем број земји повторно воведоа рестриктивни мерки. Зголемените цени на енергијата и прекините на снабдувањето доведоа до повисоки и поширпка продолжена инфлација во кинескиот сектор на недвижности и побавното од очекуваното закрепнување на приватната потрошувачка, исто така, ги ограничуваат изгледите за раст“, се вели во извештајот.
Надолната ревизија на растот на светскиот бруто домашен производ (БДП) главно е детерминирана од забавувањето на растот на двете најголеми економии во светот – САД и Кина.
БДП-то на САД се очекува да порасне за 4,0% во 2022-ра година, што е намалување за 1,2 процентни поени во однос на претходната прогноза. Главниот фактор за ова е претстојното намалување на монетарните стимулации на Федералните резерви во позадина на прекините во синџирот на снабдување.
Според проценките на ММФ, кинеската економија ќе порасне за 4,8% во оваа година, што е за 0,8 процентни поени помалку од претходните проценки.
Според пресметките на Меѓународниот монетарен фонд, Британија се очекува да биде најбрзо растечката голема индустриска економија во 2022-ра година. Според нив, растот на БДП-то на Обединетото Кралство е 4,7% во оваа година по проширувањето за 7,2% во 2021-ва година, што ја става на врвот на рангирањето на Г7 втора година по ред.
Фондот, исто така, предвидува дека глобалниот раст ќе забави до 3,8% во 2023-та година. Иако ова е за 0,2 процентни поени повисоко од претходната прогноза, зголемувањето во голема мера го одразува механичкиот раст, бидејќи сегашните пречки за раст се елиминирани во втората половина на 2022-ра година. Прогнозата е поврзана со очекувањата за подобрување на здравствената состојба во повеќето земји до крајот на 2022-ра година, под претпоставка дека нивоата на вакцинација ќе се подобрат ширум светот и терапите ќе станат поефикасни. Фондот, исто така, очекува повисоката инфлација да трае подолго од предвиденото во октомвриската проценка, со тековните нарушувања на синџирот на снабдување и високите цени на енергијата кои ќе продолжат во 2022-ра година во повеќето економии.
