Американскиот технолошки гигант „International Business Machines Corp.“ (IBM) ги продаде средствата од својот бизнис „Watson Health“ на инвестициската фирма „Francisco Partners“, соопштија двете компании.
Договорот е последниот потег на „IBM“ да ја префрли својата основна дејност кон облачни услуги. Минатата година, „Wall Street Journal“ објави дека „IBM“ ја истражува можноста за продажба на својот бизнис со здравствени аналитики како начин да ги оптимизира операциите на компјутерскиот гигант и да се фокусира на компјутерските услуги базирани на Интернет. Бизнисот „Watson Health“ користи вештачка интелигенција за анализа на дијагностички тестови и други здравствени податоци и за управување со грижата за пациентите.
„IBM“ имаше големи амбиции со вештачката интелигенција на „Watson“ да помогне во медицинските истражувања и да ја подобри грижата за пациентите, но технологијата не ги исполни првичните очекувања. Во последниве години, партнерите и клиентите се повлекоа од проектите изградени на технологијата на „Watson“, иако „IBM“ потроши милијарди долари на аквизиции за зајакнување на бизнисот.
„„IBM“ го презеде ризикот да стане пионер во сложената здравствена индустрија, но имаше ограничен успех“, рече аналитичарот на „UBS“, Дејвид Фогт цитиран од „WSJ“. Тој додаде дека трансакцијата на „Francisco“ веројатно нема големо финансиско влијание за „IBM“ поради ограничениот успех на единицата.
Според „Bloomberg“, вредноста на продадените средства, кои вклучуваат обемни збирки на податоци и производи, како и софтвер за сликање, е над 1 милијарда долари. „IBM“ ја потврди претходната статија на „Bloomberg“ за продажбата во соопштението во петокот, без да ја открие цената.
Договорот се очекува да се затвори во втората половина од оваа година, соопшти „IBM“. Сегашниот менаџерски тим ќе продолжи да врши слични функции во новата независна компанија, опслужувајќи ги постојните клиенти во секторите природни науки, владина здравствена заштита и човечки услуги. Акциите на „IBM“ го завршија тргувањето во Њујорк во петокот со пад од 1,1% до 129,35 долари. Тие се зголемени за околу 5% во последната година.
