Борба против пандемичното незадоволство со чоколадо на каучот дома: ова сигурно беше мотото на многумина минатата година и ги зголеми приходите на „Lindt & Sprüngli“. Како што објави швајцарската компанија при претставувањето на своите годишни податоци, големата побарувачка за „производи за домаќинство“ даде силен поттик за растот на приходите.
Швајцарскиот производител очекува приходите од неговите чоколади да пораснат помалку во 2022-ра година во споредба со претходната година. Компанијата, исто така, ги обвини проблемите со синџирот на снабдување за забавување на продажбата во Северна Америка кон крајот на 2021-ва година.
Производителот на популарните чоколадни бомбони „Lindor“, кој продолжи да троши на реклами и нови производи за време на пандемијата на коронавирусот, рече дека зголемувањето на пазарниот удел довело до зголемување од 13,3 отсто на органските приходи во минатата година.
„Lindt“, заедно со другите производители на чоколади, се соочи со опаѓање на побарувачката во 2020-та година, но продажбата добро се опорави во 2021-ва година, бидејќи луѓето јадеа повеќе слатки и купуваа подароци за пријателите и роднините што не можеа да ги видат среде пандемија.
Големите европски пазари и онлајн бизнисот и донесоа на компанијата двоцифрен раст, но продажбата во Северна Америка забави на 10,7 отсто на годишно ниво од 18,8 отсто во првата половина, велат од компанијата.
Доцнењето е „делумно поради привремените проблеми со синџирот на снабдување предизвикани од недостигот на работна сила и материјали во три производствени единици на „Russell Stover“, се вели во е-пошта швајцарскиот производител на чоколада, повикувајќи се на американскиот бренд на групата.
„Недостигот од работна сила и материјали во голема мера се должи на „Russell Stover“ и се подобрува од крајот на есента 2021-ва година“, велат од компанијата.
„Преземени се мерки за дополнително подобрување на состојбата. Уверени сме дека ќе се вратиме во нормала во првиот квартал од 2022-ра година“, додаваат од „Lindt“.
Аналитичарите велат дека очекувањата за компанијата се високи.
Аналитичарот на „Bernstein“, Бруно Монтејн, вели дека перформансите се поддржани од многу силниот пазар на чоколадо со врвна класа и зголемувањето на пазарниот удел. Добрите резултати во Европа и остатокот од светот го неутрализираа фактот дека продажбата во Северна Америка не ги исполни прогнозите.
Од компанијата велат дека очекуваат приходот од органска продажба да порасне за 5-7% во оваа година, во согласност со среднорочните и долгорочните прогнози.
Компанијата потврди дека очекува да пријави оперативна маржа од „околу 14%“ за 2021-ва година кога ќе ги објави своите целосни резултати на 8-ми март.
Следната година маржата ќе достигне 15% според компанијата, а потоа ќе расте за 20 до 40 базични поени годишно од 2023-та година.
Вкупниот годишен приход од продажба се зголеми на 4,59 милијарди швајцарски франци (5,01 милијарди долари), над прогнозата од 4,55 милијарди франци, според „Refinitiv“.
