Акциите на американската фармацевтска компанија „Moderna Inc.“ се соочуваат со нивната најдолга негативна серија во повеќе од две години, зголемувајќи го падот на цената од рекордно високо ниво од над 50% во август, пренесе „Bloomberg“.
Оваа серија брише околу 98 милијарди долари од пазарната капитализација на компанијата. Додека омикрон варијантата на коронавирусот е неконтролирана низ целиот свет, акциите на „Moderna“ остануваат притиснати, откако апчињата за коронавирус на „Pfizer Inc.“ и „Merck & Co.“ неодамна добија овластување за ставање во промет од Управата за храна и лекови на САД (FDA).
Акциите на „Moderna“ паднаа за 2,8% до 239,20 долари во текот на берзанскиот ден. Во последните шест дена нивната вредност е намалена за 19 отсто, што брише од вреднувањето на компанијата речиси 23 милијарди долари.
И покрај неодамнешните падови, вредноста на акциите на компанијата со седиште во Кембриџ, Масачусетс, сѐ уште е за 136% повисока од минатата година. „Moderna“, која се приклучи на S&P 500 во јули, е една од компаниите со најдобри перформанси во индексот за оваа година и заостанува само зад „Tesla Inc.“ во последните две години.
Нејзиниот американски конкурент „Pfizer Inc.“, кој заедно ја разви вакцината против Ковид-19 со германската компанија „BioNTech“, исто така забележа пад на цената на акциите.
