Американскиот иноватор Илон Маск денеска ги анкетираше своите 62,5 милиони следбеници на Твитер со прашањето дали треба да продаде 10 отсто од своите акции во компанијата Тесла, чиј основач и директор е тој.
„Во последно време многу се зборува за нереализирана добивка, која е средство за даночно затајување, па затоа предлагам да продадам 10 отсто од моите акции во Tesla“, напиша Маск во твитот, пренесува Reuters.
Тој изјави и дека ќе се придржува до резултатите од анкетата, какви и да се тие.
Коментарите на Маск доаѓаат по предлогот на американскиот Конгрес да се оданочи имотот на милијардерот со цел да се помогне во плаќањето на социјалната и климатската програма на претседателот Џозеф Бајден.
Маск, еден од најбогатите луѓе во светот, претходно на Твитер го критикуваше предложениот данок за милијардерите.
„Имајте на ум дека никаде не земам парична плата или бонус. Имам само акции, па единствениот начин лично да платам даноци е да ги продадам тие акции“, напиша Маск на Твитер.
Маск неодамна одговори на коментарите на Дејвид Бизли, директорот на Светската програма за храна на ОН, кој го повтори апелот до најбогатите луѓе во светот да искористат дел од своето богатство и еднократно да помогнат.
Бисли конкретно го спомна Маск покрај Џеф Безос, основачот на Амазон, и рече дека само два отсто од неговото проценето богатство, кое е шест милијарди долари, може да спречи 42 милиони луѓе да умрат од глад.
„Ако Светската програма за храна може да ми објасни како точно шест милијарди долари ќе го решат проблемот со гладот во светот, веднаш ќе ги продадам моите акции во „Тесла““, напиша Маск на Твитер.
