Акциите на „Abercrombie & Fitch“ паднаа за околу 10 проценти во четвртокот, откако модната компанија објави разочарувачки приходи од продажбата, бидејќи повеќе тинејџери го одложија купувањето облека за новата учебна година.
Компанијата, која исто така е сопственик на брендот „Hollister“, предупреди дека продолжува да се бори со доцнења во снабдувањето и ограничувања на залихите поради привремено прекинување на производството во странство. На краток рок, ова ќе влијае на резултатите.
„Тешко е во моментов. Сите написи што ги читате се реални“, им рече главниот финансиски директор Скот Липески на аналитичарите за време на презентацијата на резултатите.
„Abercrombie“ се соочува со задоцнување во испораката во просек од една до три недели, повлекување на испораките колку што е можно повеќе и потпирање на воздушен товар кога е потребно, рече Липески. Сепак, тој очекува овие чекори да доведат до поголеми трошоци во втората половина од годината.
Компанијата се надева дека производствените капацитети во Јужен Виетнам, кои беа затворени долго време поради пандемијата, ќе бидат повторно во функција следниот месец или до почетокот на четвртиот квартал.
„Но, во оваа фаза тоа е надвор од нашата контрола“, рече Липески.
За кварталот што заврши 31-ви јули, нето добивката на компанијата порасна на 108,5 милиони долари, или 1,69 долари по акција, од 5,46 милиони долари, или 9 центи по акција, една година претходно. Со исклучок на еднократните ставки, „Abercrombie“ заработи 1,70 долари по акција, над прогнозата од 77 центи по акција, според „Refinitiv“.
Нето продажбата се зголеми за 24% до 864,9 милиони долари од 698,3 милиони долари во претходната година. Сумата беше под очекувањата за 879 милиони долари.
Компанијата соопшти дека приходите од продажба од нејзините брендови „Hollister“, „Gilly Hicks“ и „Social Tourist“ се зголемени за 20 проценти на годишно ниво, а оние на брендот „Abercrombie“ за 30 проценти.
Компанијата рече дека приходите за вториот фискален квартал се зголемија за 3% од нивото на 2019-та година пред пандемијата. Во Соединетите држави, најголемиот пазар на „Abercrombie“, нето продажбата порасна за 31 отсто од година во година и 11 отсто од две години претходно.
За фискалниот трет квартал, „Abercrombie“ очекува нејзините нето приходи од продажба да се зголемат за 2-4% во споредба со нивото од 2019-та година.
