Модната марка „Giorgio Armani“ очекува приходите од продажба да се вратат на нивоата пред пандемијата откако изгубија околу една четвртина од нето приходите во 2020-та година, пренесува „Bloomberg“.
„Целта е да се вратиме на нивото на пред-пандемијата до 2022-ра година со повеќе од 4 милијарди евра индиректни приходи, вклучително и лиценци и повеќе од 2 милијарди евра директни консолидирани приходи“, рече Џорџо Армани, претседател и извршен директор на групацијата „Armani“.
Армани (87) останува единствен акционер во компанијата што ја ко-основаше во 1975-та година. Тој ги создаде костумите за италијанската фудбалска репрезентација, која го освои Европското првенство на почетокот на овој месец, и изгради луксузни апартмани над својата водечка продавница во Њујорк.
Компанијата со седиште во Милано минатата година објави вкупни приходи од производи со брендот „Armani“ ширум светот, вклучувајќи ги и приходите од лиценците, од 3,3 милијарди евра, што е за 21% помалку од 2019-та година. Консолидираните нето приходи на компанијата паднаа за 25% на 1,6 милијарди евра, а профитот пред камати, даноци, амортизација и амортизација изнесуваат 263 милиони евра.
Но, италијанската модна куќа започна да се опоравува во првата половина од оваа година. Нејзините консолидирани приходи заклучно со јуни се зголемија за 34% во споредба со истиот период од минатата година. Растот е поттикнат од „наглото закрепнување на обемот на продажба во Кина и САД од почетокот на годинава, а од неодамна и во Европа“.
Ова веројатно упатува на „многу подобро сценарио за профитабилност за 2021-ва година“, се вели во соопштението.
Приходите од продажба на луксузни добра во светот паднаа нагло во минатата година, првпат по многу години, бидејќи пандемијата доведе до затворање на продавниците и практично го запре меѓународниот туризам.
