Министерството за животна средина на германската држава Бранденбург е подготвено да го казни американскиот автомобилски концерн „Tesla Inc.“ поради незаконска градежна активност на местото на планираната нова фабрика за автомобили, која во моментов се гради во близина на Берлин.
Институцијата откри дека најголемиот производител на електрични автомобили во светот изградил резервоари на локацијата, за кои сè уште нема дозвола за градба, пишува весникот „Tagesspiegel“.
Сега на „Tesla“ му е забрането да ги користи предметните резервоари.
Планот на компанијата да започне со производство во својата прва европска фабрика се соочува со растечки пречки поврзани со еколошките ризици. Претходно овој месец, германскиот суд ја отфрли тужбата поднесена од две еколошки групи против групата. Тужбата, поднесена од здруженијата за заштита на животната средина „Gruene Liga“ и „NABU“, има за цел да спречи прелиминарни тестови на функционалноста на одделни сектори на фабриката.
Двете групи тврдат дека „Tesla“ ги нема разјаснето доволно мерките на претпазливост што ќе ги преземе за да спречи истекување на високо токсичен гас од објектот.
На крајот на мај, локалната полиција започна истрага за пожарот што избувна во близина на градилиштето на фабриката „Tesla“, со оглед на можноста за политички мотив откако екстремно левичарските активисти ја презедоа одговорноста за инцидентот.
„Tesla“, која претходно изјави дека ќе може да произведува до 500.000 автомобили „Model Y“ годишно, го одложи отворањето на својата фабрика во Германија до крајот на 2021-ва година откако одлучи да изгради нова фабрика во комплексот за батерии.
Илон Маск се пожали на германската бирократија, која треба да ги одобри проектите на компанијата откако изградбата на фабриката беше запрена од еколозите загрижени за негативното влијание на градежните активности врз локалната фауна и водните ресурси.
