Европската компанија за авиони „Airbus SE“ испорача 70 авиони во јуни, одбележувајќи еден од нејзините најсилни месеци од почетокот на пандемијата на коронавирусот.
Вкупниот број испорачани авиони од „Airbus“ во првата половина од годината надмина 290 авиони, што е зголемување за приближно 50% во однос на истиот период во 2020-та година.
Конечните податоци се очекува да бидат презентирани од компанијата во четврток.
„Airbus“, исто така, се очекува да забележи зголемување на нарачките во текот на изминатиот месец, откако успеа да обезбеди голема побарувачка од „United Airlines Holdings Inc“. Американската авиокомпанија соопшти дека ќе купи 70 авиони „А321нео“, додека конкурентот на „Airbus“, „Boeing Co.“ успеа да го освои лавовскиот дел од зделката со 200 авиони „737 Мах“.
Кон крајот на мај, „Airbus“ ги објави плановите за зголемување на производството на своите најпопуларни авиони „А320“ над пред-пандемиските нивоа во рок од две години, поддржувајќи го оптимизмот за закрепнување на глобалната авионска индустрија.
Најголемиот светски производител на комерцијални авиони ги извести своите добавувачи да бидат подготвени да одговорат на зголеменото производство на најпродаваните авиони со тесно тело, а производството се очекува да достигне 64 месечно во вториот квартал од 2023-та година. Обемот може да се зголеми на 70 авиони месечно во 2024-та година и да достигне 75 во 2025-та година, посочуваат од „Airbus“.
