Американскиот гигант за чипови „Qualcomm“ соопшти дека е отворен за инвестирање во британскиот дизајнер на полупроводници „Arm“, доколку продажбата на компанијата на „Nvidia“, вредна 40 милијарди долари, биде блокирана од регулаторите, објави „The Telegraph“.
Кристијано Амон, кој треба да ја преземе функцијата извршен директор на „Qualcomm“, вели дека компанијата ќе сака да купи удел во „Arm“ заедно со други инвеститори во индустријата доколку „SoftBank“ (сегашниот сопственик на „Arm“) ја пушти компанијата на берза наместо ја продава на „Nvidia“.
„Ако „Arm“ има независна иднина, мислам дека ќе видите дека има голем интерес од многу компании во екосистемот, вклучувајќи го и „Qualcomm“, да инвестираат во „Arm““, рече Амон.
Тој додаде дека „Qualcomm“ дефинитивно ќе биде отворен за ова и компанијата „преговарала со други компании кои се формирани на ист начин“, пишува „The Telegraph“.
„Qualcomm“ одби да даде коментар за „CNBC“ и „Nvidia“ рече дека првичната јавна понуда нема да биде доволна за поддршка на растот на „Arm“. Од „Arm“ не одговорија веднаш на барањето за коментар.
„Arm“ беше одделена од една од раните компјутерски компании, „Acorn Computers“, во 1990-та година. Енергетски ефикасната чип-архитектура на компанијата се користи во 95% од паметните телефони ширум светот и во 95% од чиповите дизајнирани во Кина. Компанијата го лиценцира својот дизајн на повеќе од 500 компании кои го користат за производство на свои полупроводници.
Портпарол на „Nvidia“ изјави за „CNBC“ дека на „Arm“ му треба повеќе од ИПО ако сака да го исполни својот целосен потенцијал.
„Компанијата треба да воведе нови технологии кои можат да обезбедат на „Arm“ со лиценци насекаде, па затоа направивме чекор и решивме да го купиме „Arm““, рече портпаролот. „Нашата и технологијата на „Qualcomm“ се многу комплементарни – ние ја поздравуваме помошта на „Qualcomm“ за создавање нови технологии и производи за целиот еко-систем на „Arm““, додаде тој.
Аквизицијата на „Arm“ од страна на „Nvidia“ беше објавена од компаниите во септември минатата година и се очекуваше да трае 18 месеци. „Qualcomm“ тогаш им порача на регулаторите ширум светот дека се спротивставуваат на договорот, како и „Microsoft“ и „Google“, објави „Bloomberg“.
Компаниите се спротивставуваат на зделката затоа што постои ризик „Nvidia“ да стане многу важен играч кој ја држи технологијата на „Arm“, спречувајќи ги другите производители на чипови да ја користат интелектуалната сопственост на компанијата. Прашањето е дали „Nvidia“ ќе може максимално да ја искористи аквизицијата без да го блокира пристапот до дизајнот на чипот на „Arm“.
„Nvidia“ постојано повторуваше дека ќе го задржи моделот на отворено лиценцирање на „Arm“ и ќе инвестира многу во седиштето на компанијата во Кембриџ, Велика Британија.
Но, Федералната трговска комисија, Европската комисија, британската служба за конкуренција и пазари и кинеската државна управа за регулирање на пазарот се во процес на истражување на зделката.
