Подружницата на Алкалоид во Киев ја посетија Бектеши, Мојсовски и Тасев

Денес во посета на подружницата на фармацевтската компанија Алкалоид АД Скопје во Киев, Украина, беа министерот за економија Крешник Бектеши, советникот за млади и спорт во Владата, Ѓорѓи Тасев, амбасадорот на Македонија во Украина Крум Ефремов и директорот на Агенцијата за млади и спорт Наумче Мојсовски, информраа од Владата.

„Претставништвото на Алкалоид во Киев е одговорно за етички маркетинг и за промоција на производите на Алкалоид на украинскиот пазар. Менаџерот на подружницата Дејан Каранфилов ги информираше за основната дејност, тековните активности на Алкалоид Киев и плановите за украинскиот пазар“, пишува во соопштението.

Алкалоид е извозно ориентирана компанија и околу 65 отсто од своето производство го пласира на пазарите во речиси 40 земји.

Групацијата Алкалоид брои 2.430 вработени од кои 570 се вработени во подружниците надвор од Македонија.

„Министерот Бектеши го честиташе љубилејот од 85 години на Алкалоид АД и посака успех на менаџментот на Алкалоид Киев за реализација на идните планови и посочи дека Министерството за економија како надлежно за меѓународните трговски односи на Македонија, секогаш ќе работи на создавање на поволни услови за работа на домашните компании во странство“, соопштија од Владата.