Во 2014 година, „BMW“ создаде нова низа на пазарот со тоа што ја понуди првата генерација на „4-Series Gran Coupe“. Сместен помеѓу традиционалната „3-Series“ и поголемата „петка“, моделот е дизајниран за оние кои сакаат нешто пораскошно и попрактично од стандардното купе. Сега Баварците ја презентираат втората генерација на моделот, што треба да го повтори успехот на неговиот претходник.
Новиот „4-Series Gran Coupe“ дебитира со подобра динамика, повеќе карактеристики и, се разбира, веројатно за жалење на некои, со решетка на ладилникот во форма на „бубрег“, што продолжува да предизвикува многу контроверзии. Моделот порасна во големина во споредба со неговиот претходник, зголемувајќи се во должина за 143 mm (до 4.780 mm), ширина за 27 mm и висина за 53 mm. Растојанието помеѓу двете оски е поголемо за 45 mm.
Купето се појавува на пазарот со избор од три мотори – два бензински и еден дизел, и тие се комбинирани со 8-степен автоматски менувач. Основната верзија е „420i“, под чија хауба е сместен 2.0-литарски бензински турбо-мотор со 184 ks и 300 Nm. Забрзува од 0 до 100 km/h за 7,9 секунди и има максимална брзина од 235 km/h.
Верзијата „430i“ го добива истиот мотор, но со 245 ks и 400 Nm. Тука забрзувањето од 0 до 100 km/h трае 6,2 секунди, а максималната брзина е 250 km/h. Опремата на оваа модификација вклучува адаптивни „LED“ фарови, тркала од 18 инчи (по избор има 19 инчи) и прозорци без рамка со хромирани облоги на вратите.
Најмоќната опција е „M440i“, чиј изглед потсетува на оној кај моделите „М“ на марката. Има 19-инчни тркала, преден браник во форма на буквата „U“, црни акценти на вратите и заден спојлер. Под неговата хауба се наоѓа 3.0-литарски турбо мотор со 374 ks и 500 Nm, кој го поддржува мек хибриден систем од 48 волти. Му обезбедува дополнителни 11 ks при стартување и забрзување. Оваа верзија крева до „стотка“ за 4,7 секунди и максимална брзина од 250 km/h.
„M440i“ нуди погон на четири тркала „xDrive“, со карактеристики како што се сопирачки „M Sport“, диференцијал „M Sport“ и адаптивна суспензија, кои можат да ги менуваат неговите поставки во секој режим на возење.
Дизел верзијата – „420d“, има 2.0-литарски турбо мотор со 190 ks и 400 Nm. Тој крева до 100 km/h од место од 7,3 секунди и развива максимални 235 km/h, а достапен е и во верзија со „xDrive“ систем, во која забрзувањето до 100 km/h трае 7,6 секунди.
Внатрешноста и опремата на новата „4-Series Coupe“ скоро целосно ја повторуваат онаа на нејзиниот брат со две врати, вклучително и системот „Live Cockpit“ со „iDrive 7.0“. Ова вклучува 10,3-инчен централен екран на допир и 12,3-инчен дигитален панел со инструменти. Безбедносните системи и помошниците на возачот се идентични во двата модели.
Овие вклучуваат активна контрола на брзината со автоматски „Speed Limit Assist“, контрола на маршутата, препознавање на семафорот и асистент за одржување на ленти. Стандардната опрема вклучува предупредување за преден удар, „Speed Limit Info“, предупредување за напуштање од лентата, контрола на растојание од паркирање, камера однапред и помош за паркирање во рикверц.
