Уште една марка престанува да инвестира во дизел мотори

Побарувачката за дизел мотори продолжува да опаѓа и овој тренд веројатно ќе продолжи и во следните неколку години. Скандалот со манипулираните дизели на „Volkswagen“ од 2015-та година одигра сериозна улога во ова, по што голем број европски влади постепено воведоа ограничувања на овој тип мотори.

Некои компании како „Hyundai“, „Nissan“ и „Volvo“ веќе официјално се откажаа од инвестирање во дизели за нивниот асортиман. Групата „Volkswagen“ исто така најави дека нема да развива нови вакви мотори, туку ќе ги надградува сегашните. На оваа група очигледно и се придружува и „Citroen“, чиј извршен директор Винсент Кобе изрази песимизам во врска со иднината на дизелите.

„Само пред десет години, пазарниот удел на дизел моторите во Европа беше 80%, потоа падна на под 50% и очекувам да не биде повеќе од 15% за 3 години“, изјави Кобе.

„Citroen“ во моментов нуди неколку модели со дизел мотори – „C3“, „Berlingo“, „C3 Aircross“, „C4“ и „C5 Aircross“. Сепак, новиот „C5 X“ доби само бензински и хибридни варијанти, што ја покажува новата позиција на француската марка. Кобе додаде дека одлуките на голем број европски влади за забрана на мотори со внатрешно согорување ги принудуваат големите компании постепено да се откажат од овој вид мотори. Соодветно на тоа, тие се принудени да вложат сè во електрични погонски системи.