„Foxconn“, најголемиот подизведувач на електроники во светот, објави помала заработка од четвртиот квартал отколку што се очекуваше, и покрај големата продажба на „iPhone 12“ и побарувачката на разни уреди за време на пандемијата.
Тајванската компанија, чиј главен клиент е „Apple“, објави нето профит од 45,97 милијарди тајвански долари (1,61 милијарди американски долари) за периодот од октомври до декември.
Ова претставува пад од 4% во споредба со претходната година, се вели во соопштението на компанијата. За споредба, просечната прогноза на 11 аналитичари анкетирани од „Refinitiv“ беше 50,89 милијарди тајвански долари.
Компанијата, чие официјално име е „Hon Hai Precision Industry“, објави раст на приходите од 15% за четвртиот квартал на годишно ниво. Ова главно се должи на повеќе од 15 проценти зголемување на продажбата на потрошувачка електроника, вклучително и паметни телефони, кои учествуваат со 63% во приходот за кварталот, објави „Foxconn“ без да открива детали.
Претходно, „Foxconn“ соопшти дека очекува индикаторот да забележи пад од 3% или да постигне мало зголемување од 3% во споредба со претходната година.
Компанијата објави дека очекува приходите да пораснат за околу 10% во 2021-ва година благодарение на „повисоката од очекуваната“ продажба на паметни телефони, вклучувајќи го и новиот „iPhone 12“, како и телекомуникациските уреди – тренд поврзан со работата од дома за време на пандемијата.
Цената на акциите на „Foxconn“ скокна скоро 41% в оваа година. Денес таа го заврши денот на тргување со пораст од 0,78% во споредба со растот на 0,48% на поширокиот пазар.