Претставувајќи ја серијата „iPhone 12“ во минатата година, „Apple“ непријатно изненади многу корисници со одлуката да ги отстранат полначите и слушалките од пакувањето. Додека тие го правдаа тоа со еколошки причини, не е ни чудо што повеќето луѓе не го гледаат ова како оправдан потег, а Бразилците отидоа чекор подалеку.
Бразилската агенција за заштита на потрошувачи во Сао Паоло (Procon-SP) неодамна го казни „Apple“ со 2 милиони долари за недостатокот на полначи во кутиите. Според таа организација, „„Apple“ учествувал во лажно рекламирање и продажба на уреди без полначи по нефер услови“.
На крајот на минатата година, „Apple“ навистина објави дека нивните уреди ќе доаѓаат без полнач, меѓутоа, кога од „Procon-SP“ беа запрашани дали тоа значи дека телефоните ќе бидат поевтини, тие не добија никаков одговор, пренесува порталот „9to5Mac“.
Тие исто така го обвинија „Apple“ дека не обезбедува доволно квалитетна поддршка за корисниците „кои имаа проблеми по ажурирањето на софтверот“ и тие тврдат дека американската компанија мора да ги почитува регулативите и законите, како што прават сите други компании.
