Шведско-британскиот фармацевтски гигант „AstraZeneca“ го продаде својот удел во американската „Moderna“ за повеќе од една милијарда долари, пренесува „Reuters“.
„AstraZeneca“ поседуваше 7,7% од акциите на „Moderna“, кои нагло пораснаа во последните месеци. Американската компанија разви РНК вакцина против Ковид-19, која во моментов се користи и во Европа и во САД.
Од друга страна, „AstraZeneca“ има своја вакцина, изработена во соработка со Универзитетот во Оксфорд, која се базира на конвенционална векторска технологија.
Сè уште не е јасно во кој временски период се продадени акциите. Ниту една од двете компании официјално не ја коментираа темата, пишува агенцијата.
Сепак, според нејзините извори, „AstraZeneca“ ќе го одржи партнерството со „Moderna“ во развојот на лекови за други болести.
„Moderna“ очекува продажбата на нивната вакцина против Ковид-19 да достигне 18,4 милијарди долари во оваа година.
