„Huawei“ во април ќе го отстрани „Android“ од милиони телефони

Од април, „Huawei“ го исфрла „Android“ од своите претстојни телефони. Ова е кулминација на санкциите наметнати врз кинеската компанија од страна на американската администрација и кои го спречија „Huawei“ да соработува со американски компании, вклучувајќи го и „Google“.

Наместо „Android 11“, новите уреди на „Huawei“ ќе го користат сопствениот софтвер „HarmonyOS“ на компанијата. Веста за овој потег беше откриена за време на најавата за новиот флексибилен телефон „Mate X2“, кој беше официјализиран претходно оваа недела. „Huawei“ тогаш истакна дека иако „Mate X2“ пристигнува со платформата „Android“ по објавувањето, корисниците ќе можат да се префрлат на „HarmonyOS“, кога софтверот ќе стане официјално достапен во април.

„Huawei“ веќе некое време нуди алтернатива на услугите на „Google“, преку „App Gallery“ што е пандан на „Play Store“. Оваа продавница за апликации направи значителен напредок од своето објавување и сега нуди милиони популарни и официјални апликации, вклучувајќи ги „ТикТок“, „Snapchat“ и „Amazon“. Се разбира, нема апликации на „Google“, како што се „Gmail“, „Maps“ или „Docs“, но „Huawei“ се обидува да го реши овој проблем со објавување на своите верзии на овие апликации.

Останува да видиме како ќе работи „HarmonyOS“ и дали може целосно да се натпреварува со екосистемот на „Google“. Можно е ова да го видиме веќе со најавата за линијата „Huawei P50“, што се очекува наскоро.