Најголемата европска ниско тарифна авиокомпанија, „Рајанер“ (Ryanair) најави воведување на долги летови во својата понуда, но прогнозира и слаб раст во 2013 година.
Извршниот директор на компанијата Мајкл О’Лири на пресконференцијата во Рим по повод претставувањето на новите рути за Италија и Северна Африка изјави дека во 2013 година се предвидува раст од три до четири отсто, а дека услугите на ирската авиокомпанија ќе ја користат околу 82,5 милиони патници.
– Летните месеци ќе бидат поприлично мирни, а најголемиот дел од растот ќе го оствариме во текот на зимата, рече О’Лири.
Тој нагласи дека компанијата воведува долги летови и дека има план за набавка на нови авиони од Боинг кон крајот на оваа или почетокот на наредната година.
О’Лири ги оцени проблемите на Боинг со новиот „787“ како „преценети“, иако воздухопловните власти минатата недела од безбедносни причини ги приземјиа сите Дримлајнери.
