На контото на 28.573 штедачи кои на книшките имале депозити над 30.000 евра се половината од вкупните заштеди на граѓаните.
Вкупните депозити на граѓаните заклучно со декември лани достигнаа 4 милијарди 637 милиони евра. Од нив речиси 2,2 милијарди, заклучно со јули лани биле на сметките на овие лица. Сумите кои ги чуваат во банка се над 30.000 евра – износ кој не е осигуран доколку дојде ризичен настан кај некоја банка – покажува статистиката на Фондот за осигурување на депозити за првите шест месеци лани. Она што е најинтересно е дека бројот на „големите штедачи“ во првите шест месеци лани се зголемил за нови 424 граѓани кои и за време на најголемата светска криза – лани, успеале да заштедат дополнителни речиси 49 милиони евра. Или во најкритичните месеци од април до јуни кога цел свет беше во карантин, бројот на „побогати“ лица кои имаат заштеди над 30.000 евра пораснал за нови 169 лица, а сумата на заштеди пораснала за околу 8 милиони евра.
Во просек пак ако оваа сума од речиси 2,2 милони евра колку што ги имало на средината од минатата година се подели на 28.573 лица, излегува дека секој поединечно има во просек по околу 76.000 евра. Но како се распределени парите и има ли милионери меѓу нив, не се знае, бидејќи таква статистика не води Фондот, туку ги брои само оние со заштеди над 30.000 евра.
Износите до 30.000 евра се осигурани и законски се обештетуват од државата доколку пропадне банката или штедилницата, додека пак „висат“ износите над 30.000 евра. Таков беше случајот со пропаѓањето на Еуростандард банка, каде 708 штедачи заглавија со износи над 30.000 евра кои законски се исплатуваат до овој износ, а остатокот е на чекање ако останат пари од стечајната маса.
Податоците покажуваат дека е мал бројот на вакви лица кои штедат во штедилници.
Инаку Фондот за осигурување на депозити, во случај на настанување на ризичен настан врши обештетување до 30.000 евра во денарска противвредност по депонент. Во износот до 30.000 евра предмет на обештетување се и главницата и каматата на сите депозити на кои е имател едно лице депонент во банка на денот на настанување на ризичниот настан. Се осигуруваат депозитите во денари и девизни средства, вклучувајќи ја и каматата на физичките лица кои се чуваат во банките. Осигурани се трансакциските сметки, денарските и девизните депозити (штедни книшки), сертификатите за депозити, депозитите врзани за парични картички и девизните приливи на физичките лица.
„Депозити кои не се осигурени се тие со привилегирани каматни услови, различни од оние кои се објавени во банката, депозити на членови на органите на управување на банката, роднини од прв степен како и депозити кои се поврзани со трансакции со кои се вршело перење пари, доколку прекршителот е осуден и казната е во сила“, стои во образложението од Фондот.
С.А
Коментари