Минатата година дознавме дека американскиот претседател во заминување Доналд Трамп платил данок од 750 долари или помалку во последните години и дека тој и неговите компании имаат заостанат долг што може да надмине милијарда долари.
Ова е во целосна спротивност со новоизбраниот претседател, кој некогаш беше нарекуван „најсиромашниот човек во Конгресот“, Џо Бајден.
Вистина е дека Бајден е исто така богат, но неговата нето вредност и начинот на кој тој дојде до богатството се многу полесни за следење, особено затоа што објавува даночни пријави секоја година повеќе од десет години.
Со семејно минато на кое не му недостасува ниту богатство, ниту неволји, Бајден поминал многу години како „средна класа“ пред да се здобие со моменталната нето вредност, пишува политичкиот уреднички одбор на списанието “Мари Клер”
Колку вреди денес Џо Бајден?
Сè на сè, Џо во моментов вреди 9 милиони долари, што е значително повеќе отколку порано во неговата кариера. Оваа сума, до која дојде Форбс во јули 2019 година, се заснова на вкупното портфолио од 4 милиони долари недвижнини (Џо и сопругата Џил Бајден поседуваат два дома во Делавер), пари/инвестиции вредни 4 милиони долари и федерална пензија вредна повеќе од 1 милион долари.
Бајденови во даночните пријави од 2016 до 2018 година, покажале дека платиле околу 5.2 милиони долари, но и дека значителна сума донирале и добротворни цели (1,27 милиони американски долари).
Како Бајден ги заработи своите пари?
Џо Бајден Постариот, кој имал големо влијание врз неговиот син, потекнувал од богато семејство – неговиот татко го водел “American Oil”. Но, Џо Постариот започнал бизнис самостојно како претприемач и имал неколку деловни неуспеси, оставајќи го семејството сиромашно според мемоарите на неговиот син (во еден момент децата дури и отишле кај баба им).
Џо Постариот на крајот нашол работа во продажба на автомобили и семејството се сместила во Делавер – таму останале до ден денес – а Џо јуниор заврши програма за студирање-работа за да присуствува на престижната академија Архмер во Клејмонт.
Џо започнал да работи во адвокатска фирма откако се оженил со неговата прва сопруга Нилија, а потоа стана еден од најмладите сенатори некогаш избрани, со почетна плата од околу 42.500 УСД годишно (250.000 УСД во денешни долари, прилагодени на инфлацијата).
Тој започнал да ги објавува даночните пријави во 1998 година и од нив било очигледно дека приходот на двојката доаѓа од неговата плата во Сенатот. И работата на неговата сегашна сопруга Џил придонесе за нивниот вкупен приход: таа се занимава со образование повеќе од три децении. Во 2009 година, платата за сенатор била 169.300 УСД, а потоа неговата плата како потпретседател за време на мандатот на претседателот Обама во просек изнесувала околу 225.000 УСД секоја година.
Колку заработи Џо Бајден како потпретседател?
Кога Џо официјално го заврши својот мандат како потпретседател, тој поднесе формулар за финансиска евиденција во кој се наведува неговата нето вредност помеѓу – 897 000 и 489 000 УСД.
Како потпретседател, тој заработувал околу 225.000 УСД секоја година. Но, потоа, во текот на следните две години, парот очигледно заработил повеќе од 15 милиони долари од држење говори, турнеи со книги (и тој и Џил објавија мемоари) и лидерство во “Пем Бајден” центарот за дипломатија и глобален ангажман на Универзитетот во Пенсилванија (моментално е на пауза).
За возврат, тие успеаа да дадат повеќе донации и да отплатат една од своите хипотеки – една сè уште неплатена, како и кредитна линија за еден од нивните синови – и да купат нов имот на плажата Рехобот.
Колкава е платата на Џо Бајден како претседател?
Законите во САД наведуваат дека на претседателот на Соединетите држави мора да му се исплаќа плата додека е на функција. Во 2001 година, Конгресот ја зголеми платата на претседателот од 200 000 на 400 000 УСД и додаде дополнителни трошоци од 50 000 УСД годишно. Претседателот, исто така добива неданочен износ за патување од 100 000 и 19 000 УСД за забава. Претседателската плата се оданочува, но другите додадени трошоци не се оданочуваат.
Интересно, Џил Бајден ќе продолжи да предава и како прва дама.
„Ако стигнеме до Белата куќа, јас ќе продолжам да предавам. Важно е и сакам луѓето да ги ценат наставниците и да го знаат нивниот придонес и повеќе да ја почитуваат оваа професија “, рече таа за CBS Sunday Morning во август.
Ова ќе ја направи единствена прва дама што има платена работа и прва што ќе има докторат.
