Јужнокорејскиот технолошки гигант „Samsung Electronics“ објави дека следната премиера на новиот смартфон ќе се одржи на 14-ти јануари, кога се очекува да ја претстави најновата верзија на своите паметни телефони од серијата „Galaxy“, пишува „CNBC“.
Поканите испратени од најголемиот светски производител на паметни телефони покажуваат дека настанот ќе се емитува на веб-страницата на „Samsung“ следниот четврток.
Премиерата ќе се одржи во истата недела со најголемото технолошко шоу за годината „CES 2021“, кое овојпат ќе биде целосно дигитално и каде компаниите често ги покажуваат своите нови производи.
„Samsung“ обично ги претставува своите нови предводници на „Galaxy“ во февруари, поблиску до Светскиот конгрес за мобилни телефони.
Во поканата за настанот на 14-ти јануари, „Samsung“ не откри многу. Сепак, во медиумите веќе протекоа информации кои сугерираат дека компанијата ќе претстави три паметни телефони: „Galaxy S21“, „S21+“ и „S21 Ultra“, кои најверојатно ќе бидат наследници на сериите „Ѕ20“.
Минатата година, јужнокорејската компанија објави дека нејзините резултати за третиот квартал се делумно поддржани од продажбата на паметни телефони, вклучувајќи го и „Galaxy Note 20“. Но, „Samsung“ предвидува дека постои голема конкуренција кај смартфоните и потрошувачката електроника во последниот квартал од годината според аналитичарите, а тоа ќе се должи на изгледот на „iPhone 12“ и „iPhone 12 Pro“.
Претседателот на „Samsung“ и шефот на ивниот бизнис за мобилни комуникации, „ТМ Рох“, во блогот на компанијата во декември напиша дека „Samsung“ ќе го прошири своето портфолио на флексибилни паметни телефони и ќе ги направи овие уреди „подостапни за сите“ во 2021-ва година. Досега, овој тип смартфони е достапен по повисоки цени, како што е „Galaxy Z Flip“, на пример, чини скоро 1.400 американски долари.
Акциите на „Samsung Electronics“ во Јужна Кореја денеска пораснаа скоро 3%.
