Шефот на Светската здравствена организација (СЗО), Тедрос Аданом Гебреизус, предупреди во неделата дека пандемијата на коронавирусот не е последна пандемија и дека земјите треба да инвестираат во јавното здравство за да се подготват за идните здравствени кризи.
„Историјата нè учи дека ова нема да биде последна пандемија, а епидемиите се животни факти“, рече Тедрос во видеото по повод првиот Меѓународен ден на подготвеност за епидемија.
Лидерот на СЗО рече дека поголемите инвестиции во јавното здравство, со поддршка на владите и општеството, можат да „осигурат дека нашите деца и нивните деца ќе наследат побезбеден, поотпорен и одржлив свет“.
Тој додаде дека коронавирусот „го сврте светот наопаку“ во текот на изминатата година и има далекусежни последици за економијата и општеството.
Но, самата пандемија не е изненадување, рече Тедрос, истакнувајќи дека со години предупредуваат на таквата можност и неподготвеност на светот.
„Сите треба да научиме лекција од пандемијата. Пандемијата ја истакна важноста на тесните врски помеѓу здравјето на луѓето, животните и планетата, што бара заеднички пристап“, рече шефот на СЗО.
