„Galaxy A22 5G“ може да биде најевтиниот 5G телефон на „Samsung“ за следната година

Неодамнешните извештаи сугерираат дека „Samsung“ може да претстави најмалку три телефони од серијата „А“, како што се „A32 5G“, „Galaxy A52 5G“ и „Galaxy A72 5Gv“. Меѓу нив, се верува дека „Galaxy A32 5G“ ќе пристигне како најевтин 5G телефон на јужнокорејската компанија. Сепак, најновите информации укажуваат дека „Galaxy A22 5G“, кој се очекува следната година, би можел да ја носи титулата најевтин телефон 5G на „Samsung“.

„Galaxy A32 5G“ се очекува на почетокот на 2021-ва година, со цена од околу 299 евра. Новиот извештај сугерира дека „Galaxy A22 5G“ ќе дебитира во средината на следната година, по цена од околу 200.000 вони, што е околу 185 долари. Телефонот ќе биде насочен кон растечките пазари, како Индија и земјите од Јужна Азија.

„Galaxy A22 5G“ се очекува да го наследи моделот „Galaxy A21 LTE“, кој беше претставен пред неколку месеци. Телефонот ќе се натпреварува со ефтините 5G телефони од „Huawei“, „Xiaomi“, „OPPO“ и „Vivo“.

„Samsung“ најверојатно ќе ја користи стратегијата „JDM“ за производство на моделот „Galaxy A22 5G“, во партнерство со кинеските компании „Wingtech“ и „Hwachin“. „Samsung“ треба делумно да се вклучи во производството на некои важни делови за телефонот.

Засега нема информации за спецификациите на телефонот „Galaxy A22 5G“ и се очекува да се види дали телефонот може да користи „Dimensity 700 5G“ или некој друг чипсет од пониска класа што нуди поддршка за 5G конекцијата.