Лизинг комапаниите лани со профит од 1,4 милиони евра – раскинале 182 договори вредни речиси 4,2 милиони евра

Лизинг компаниите во земјава лани оствариле добивка од 1,4 милиони евра, која е за речиси 200.000 евра поголема од претходната 2018 година – покажуваат податоците на Народната банка. Лани наплатиле 3,5 милиони евра од камати, од кои чисти им останале 2,4 милиони евра. Приходите од оперативен лизинг лани речиси и да се дуплирале во однос на 2018 година. Па ако тогаш имале 4,8 милиони евра приходи од операстивен лизинг лани приходите по овој основ пораснале на 7,5 милиони евра: приходите пак од тековното работење  достигнале 11,8 милиони евра, а на расходи отишле 9 милиони евра.

Податоците на Народната банка покажуваат и дека лани се дуплирал и бројот на раскинати договори и со компании и со граѓани во однос на 2018 година. Па така лани биле раскинати вкупно 182 договори вредни 4,2 милиони евра. Од нив 102 договори биле со компании кои не ги плаќале редовно ратите за лизингот, а вредноста на овие договори била 3,1 милион евра. Додека пак и 80 граѓани останале без своите автомобили, бидејќи биле раскинати договори за лизинг со 80 физички лица вредни 1 милион евра.

Бројките покажуваат дека во моментов лизинг компаниите во зeмјава имаат активни договори вредни 114 милиони евра. Најголем дел од активните договори за лизинг и со компаниите и со граѓаните според рочноста биле склучени на период од 1 до 5 години.

Според податоците лизинг компаниите имаат активни договори со фирми вредни 357.000 евра со рочност од една година. Активните договори со рок од 1 до 5 години со компаниите се со најголема вредност или речиси 76 милиони евра. Додека тие  од 5 до 10 години се со вредност од 16,5 милиони евра. Или вкупно активните договори за лизинг со компании тежат 92,5 милиони евра.

Сумите пак на активни договори со граѓаните се пониски  и изнесуваат вкупно 21,8 милиони евра. Од нив најмала вредност имаат договорите со рочност до 1 година или речиси 114.000 евра. „Најтешки“ се тие со рок од една до пет години или 11,4 милиони евра, а тука некаде или околу 10,3 милиони евра тежат активните договори со граѓаните за кои лизингот трае од пет до десет години.

С.А