„Google“ преговара за купување канцелариски комплекс во Лондон за 800 милиони фунти (1 милијарда долари), што би било една од најголемите вакви зделки во британската престолнина оваа година, според „React News“ и „Bloomberg“.
Компанијата започна преговори за аквизиција на комплексот „Central Saint Giles“ од страна на нејзините сопственици „Legal & General Group“ и „Mitsubishi Estate Co.“, пренесува „React“, без да прецизира од каде потекнува информацијата. Досега не е потпишан договор. „Google“ веќе зафаќа околу 40% од канцеларискиот простор во комплексот во близина на „Tottenham Court Road“.
Портпаролите на „Legal & General Investment Management“ и „Mitsubishi Estate“ одбија да коментираат во врска со оваа тема. Претставниците на „Google“ не биле достапни за дополнителни информации.
Компанијата е во фаза на изградба на нов кампус во лондонскиот кварт „Кингс Крос“, во кој ќе бидат сместени 4.500 вработени во Велика Британија. Договорот со „Central Saint Giles“ ќе му даде на „Google“ флексибилност бидејќи го финализира својот друг проект, чии датуми на завршување и преместување не се потврдени, забележува „React“.
„Google“ беше една од првите големи корпорации што побара од вработените да работат од дома кога коронавирусот започна да се шири во март. Компанијата во јули објави дека ќе им овозможи на своите вработени да ја вршат својата работа од далечина за уште една година, одложувајќи ги плановите за повторно отворање канцелариите.
„Land Securities Group“, една од најголемите компании за недвижнини во Велика Британија, сигнализираше дека има доверба во иднината на канцелариите во Лондон во стратегијата што ја истакна во понеделникот новиот извршен директор Марк Ален. Компанијата планира да ги продаде сите свои средства, вклучително и нејзините имоти за забавни цели и да ги реинвестира приходите во изградба на нови канцеларии и проекти за мешана употреба.
